«Պարացետամոլ»-ի դեֆիցիտ. նախարարությունից հերքում են, դեղատան աշխատակիցները` հաստատում․ ՏԵՍԱՆՅՈՒԹ

Վերջին օրերին քաղաքացիներն ահազանգում են, որ մայրաքաղաքի դեղատներում պարացետամոլի դեֆիցիտ կա․ եթե անգամ որոշ դեղատներում հնարավոր է գտնել դեղամիջոցը, ապա ոչ նախկին արժեքով։ Շուկայում ջերմիջեցնող այս դեղամիջոցի գինն աճել է։ Factor TV-ն այցելել է երևանյան 10-ից ավելի դեղատուն՝ պարզելու խնդրի սրությունն ու պատճառները։

«Վերջացել է»,- այս պատասխանը լսեցինք մեր այցելած 12 դեղատներից 8-ում։ Ե՞րբ դեղատները կստանան պարացետամոլ դեղամիջոցը՝ աշխատակիցները տարբեր պատասխաններ են տալիս․ ասում են՝ պահեստներում սպառվել է, փոխարենը ջերմիջոցնող այլ դեղամիջոցներ են առաջարկում։ 12 դեղատներից պարացետամոլ ընդամենը 4-ում էր առկա, գներն էլ տատանվում էին 100-150 դրամի սահմաններում։

Առողջապահության նախարարությունից մեզ վստահեցրին՝ ՀՀ-ում պարացետամոլի դեֆիցիտ չկա․ դիտարկմանը, թե մեր շրջայցը հակառակն է ապացուցում, պարզաբանում են՝ շնչառական վարակներով և կորոնավիրուսի «օմիկրոն» շտամով պայմանավորված սպառումն է ավելացել։

Արդյո՞ք պարացետամոլի բացակայությունը որոշ դեղատներում կամ գնաճը կարող է հակամրցակցային պայմանավորվածությունների արդյունք լինել․ փորձեցինք պարզել  Տնտեսական մրցակցության պաշտպանության պետական հանձնաժողովից։ Խոսնակ Անի Սմբատյանը Factor TV-ի հետ զրույցում ասաց, որ առաջիկայում դեղերի շուկայի ուսումնասիրության վերաբերյալ զեկույց կհրապարակվի, սակայն այդ զեկույցը վերաբերում է սիրտ-անոթային հիվանդությունների բուժմանն առնչվող դողորայքի հետ։ ՏՄՊՊՀ-ից այլ մեկնաբանություն չտվեցին, միայն հավելեցին, որ անհրաժեշտ է ուսումնասիրել ամբողջ շղթան՝ ձեռքբերումից մինչև վաճառք։

«Սպառողների խորհրդատվության կենտրոն» ՀԿ նախագահ Կարեն Չիլինգարյանը նկատում է՝ դեղամիջոցների գնաճ պարբերաբար է արձանագրվում․ նա մատնանշում է այն, որ ՀՀ-ն 80%-ից ավելի դեղամիջոց ներկրում է այլ երկրներից։ Բացի այդ, համավարկը ևս ազդեցություն է ունեցել դեղամիջոցների գնաճի վրա․ դրանց պահանջարկի ավելացմանը զուգահեռ՝ գինը զգալի բարձրացել է։

Իշխանություններն առաջիկայում մտադիր են «Դեղերի մասին» օրենքում նոր փոփոխություններ մտցնել։ Նրանց հաշվարկներով՝ դա թույլ կտա զսպել դեղերի գնաճը, որոշ դեպքերում էլ՝ նպաստել գների նվազմանը։

Մանրամասները՝ տեսանյութում։

Արփի Հակոբյան