29.07.2026 | 11:39
Թրամփը հայտարարել է, որ Զելենսկիի հետ հանդիպումը «շատ լավ» է անցել
Ալիևը չի կատարում ՄԱԿ-ի միջազգային դատարանի որոշումը՝ զբաղվելով հայատյացության քարոզչությամբ․ նա կրկին սպառնացել է Հայաստանին
Քաղաքականություն
31.01.2022 | 23:12
Ադրբեջանի նախագահ Իլհամ Ալիևը Գանձակ կատարած այցի ժամանակ «Ազերթաջ»-ին տված հարցազրույցում կրկին սպառնալիքներ է հնչեցրել Հայաստանի հասցեին։ Ադրբեջանի նախագահը, խախտելով ՄԱԿ-ի Արդարադատության միջազգային դատարանի որոշումը, կրկին հայատյաց քարոզչությամբ է զբաղվում։
Նա, մասնավորապես, հայերին «ֆաշիստ» է անվանել։
«Այո՛, պատերազմն ավարտվել է։ Մենք խոսում ենք, որ պետք է լինի խաղաղություն, բայց երբեք չպետք է մոռանանք «հայկական ֆաշիզմը»։ Մենք հաղթել ենք «հայկական ֆաշիզմին»։ Մենք պետք է այնպես անենք, որ այն երբեք գլուխ չբարձրացնի»,- ասել է Ալիևը՝ հավելելով․ «Դա պետք է իմանան ու գիտակցեն Հայաստանի հովանավորները և գնահատեն մեր «պատմական առաքելությունը»։ Մենք ոչ միայն «ազատագրել ենք մեր տարածքները», այլև տարածքը մաքրել այդ «բարբարոս ուժերից»։ Հիմա նրանք ապրում են թշվառ վիճակում, սակայն ոչ ոք չի կարող երաշխավորել, որ կրկին չեն բարձրանա։ Մենք ոչ մի դեպքում չենք կարող թույլ տալ, որ Հայաստանը կրկին Ադրբեջանի համար պոտենցիալ սպառնալիք դառնա։ Եթե մենք դա նկատենք, տեղում կոչնչացնենք»։
Ստացվում է, որ Ադրբեջանի նախագահը շարունակում է չկատարել ՄԱԿ-ի Արդարադատության միջազգային դատարանի դեկտեմբերի 7-ի միջանկյալ որոշումը՝ զբաղվելով հայատյաց քաղաքականությամբ ու քարոզչությամբ։
Հիշեցնենք՝ ՄԱԿ-ի Միջազգային դատարանը պարտավորեցրել էր Ադրբեջանին քայլեր ձեռնարկել՝ ռասայական ատելության ու խտրականության կանխարգելման համար, այդ թվում՝ պետական պաշտոնյաների և հանրային տարբեր կառույցների կողմից, որոնք թիրախավորում են էթնիկ հայերին։ Դատարանը հստակ արձանագրում է, որ Ադրբեջանը պետական մակարդակով զբաղվում է հայատյաց ու խտրական քաղաքականությամբ, որը շարունակում է Ալիևը։
Էմմա Չոբանյան
