Թուրքիայում ապօրինի ցանցերը կեղծ անձնագրեր են տրամադրում ԻԼԻՊ-ի անդամներին՝ Արևմուտք մեկնելու համար

Թուրքիայում անօրինական ցանցերը կեղծ անձնագրեր են վաճառում ԻԼԻՊ-ի անդամներին, որոնք ճանապարհորդում են Մեծ Բրիտանիա, ԵՄ երկրներ, Կանադա և ԱՄՆ-ը։ Այս մասին պարզել է The Guardian-ի հետաքննությունը, որը ներկայացնում է Duvar-ը։

Նշվում է, որ պարբերականի լրագրողները տեղյակ են առնվազն 10 դեպքի մասին և մանրամասներ են հայտնել ցանցի մասին, որը ղեկավարում է Թուրքիայում Ուզբեկստանի մի քաղաքացի։ Տեղեկատվության համաձայն՝ ազգությամբ ուզբեկը, որը կապեր ունի ծայրահեղականների հետ, մինչև 15․000 դոլար արժողությամբ անձնագրեր է վաճառում։

«Առնվազն 10 դեպքը, որոնց մասին Guardian-ը տեղյակ է, մարդիկ, որոնք սիրիական սահմանը հատել են և հասել Թուրքիա, դա արել են՝ Ստամբուլի օդանավակայանով  ճամփորդելու համար»,- ասվում է հրապարակման մեջ։

Նշվում է, որ ուզբեկի «բիզնեսն» այնքան լավ է ընթանում, որ նա վերջերս նոր ալիք է բացել Telegram-ում՝ գաղտնագրված հաղորդագրությունների հավելվածում, որը պաշտոնապես կոչվում է «Istanbul Global Consulting»։

ԱՄՆ ներքին անվտանգության դեպարտամենտի աղբյուրը Guardian-ին հայտնել է, որ իրենք տեղյակ են «Թուրքիայում առանձնահատուկ վաճառողի գոյության մասին, որը ԻԼԻՊ-ի անդամներին տրամադրում է շատ բարձր մակարդակի կեղծված  փաստաթղթեր»։ Անանուն աղբյուրն ասել է, որ անձնագրավաճառն օգտագործում է ռուսերեն, արաբերեն և այլ լեզուների տիրապետող անձանց՝ տարբեր հաճախորդների սպասարկելու համար։

«Մենք տեղյակ ենք, որ ԻԼԻՊ-ի անդամներն օգտագործում են այդ կեղծ անձնագրերը՝ Եվրոպա անցնելու համար, և եվրոպական անվտանգությանը չի հաջողվում նրանց բոլորին ձերբակալել»,- ասել է պարբերականի աղբյուրը։

Էմմա Չոբանյան