10.02.2026 | 11:24
Ինչո՞ւ վարչապետի 2024-ի հանձնարարականը չի կատարվել․ Հայկ Սարգսյանը՝ ՊԵԿ փոխնախագահին․ ՏԵՍԱՆՅՈՒԹ
Ռազմական գործողությունը կանխելու հնարավորություն կա. Կուլեբան՝ Ռուսաստանի Դաշնության կողմից ներխուժման հավանականության մասին
27.01.2022 | 22:59
Ռուսաստանը ապակայունացնելու է Ուկրաինան, սակայն ռազմական գործողությունը կանխելու հնարավորություն դեռ կա. այս մասին ճեպազրույցում հայտարարել է արտաքին գործերի նախարար Դմիտրի Կուլեբան, գրում է РБК-Украина-ն։
Նրա խոսքով՝ Դոնբասում իրավիճակը փխրուն է, սակայն ծանր մարտեր չկան։
«Ռուսական զորքերի թիվն աճում է, բայց մենք կարծում ենք, որ այժմ Ռուսաստանի ծրագիրն է՝ օգտագործել ուժի սպառնալիքը՝ ներսից ապակայունացնելու Ուկրաինան, խուճապ սերմանել և ստիպել մեզ գնալ զիջումների», – ասել է Կուլեբան։
Նրա խոսքով՝ Ռուսաստանի Դաշնության գլխավոր պլանը (ռազմական ներխուժումը) նախատեսում է ոչ միայն զորքերի կենտրոնացում, այլև՝ կիբերհարձակումներ և ապատեղեկատվության տարածում։
«Մեր կառավարության դիրքորոշումն այսպիսին է՝ Ռուսաստանի Դաշնության ապակայունացնող գործողությունները, ներառյալ կիբերհարձակումները, ապատեղեկատվությունը, տնտեսական ճնշումը, կրիտիկական ենթակառուցվածքների վրա հարձակումներն անխուսափելի են, դրանք արդեն տեղի են ունենում: Բայց մենք դեռ հնարավորություն ունենք կանխելու ռազմական գործողությունը»,- ասել է Կուլեբան։
Նախարարը նշել է, որ հիմնական առաջնահերթությունը Ռուսաստանին թույլ չտալն է իրականացնել իր հիմնական ծրագիրը։
«Ուկրաինան պատրաստ է ցանկացած սցենարի, մենք չպետք է ոչինչ բացառենք, բայց մենք հասկանում ենք, որ ռազմական գործողությունն այն է, ինչ նրանք դեռևս պահում են իրենց գրպանում։ Նրանք չեն դիմի դրան, քանի դեռ այլ տարբերակներ չեն օգտագործվել», – ասել է Կուլեբան։
