17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Խուճապի մատնվելու պատճառ չկա․ Ուկրաինայի նախագահը՝ Դոնբասում իրավիճակի մասին
Քաղաքականություն
25.01.2022 | 16:45
Ուկրաինայի նախագահ Վլադիմիր Զելենսկին Ազգային անվտանգության և պաշտպանության խորհրդի (ԱԱՊԽ) նիստից հետո հայտարարել է, որ Կիևն աշխատում է Դոնբասում իրավիճակի ամբողջական ապաէսկալացիայի ուղղությամբ՝ խաղաղ կարգավորման միջոցով։ Հունվարի 24-ի երեկոյան պետության ղեկավարի տեսաուղերձը հրապարակվել է նրա Telegram ալիքում, գրում է DW-ի ռուսական ծառայությունը։
«Ամեն ինչ վերահսկվում է, խուճապի մատնվելու պատճառ չկա»,- ասել է Զելենսկին։
Նրա խոսքով՝ Ուկրաինայի իշխանությունները պատրաստ են ամեն ինչի, բայց հավատում են լավագույնին և դրա համար անում են «բացարձակապես ամեն ինչ՝ գործընկերների, դիվանագետների և զինվորականների հետ միասին»։ Ուկրաինայի նախագահը քաղաքացիներին հորդորել է «հանգիստ լինել և չբղավել, թե ամեն ինչ կորած է»։
Նիստին հաջորդած ճեպազրույցում ԱԱՊԽ քարտուղար Ալեքսի Դանիլովը նաև հորդորել է ուկրաինացիներին հանգստություն պահպանել՝ նշելով, որ չի տեսնում Ուկրաինայի դեմ Ռուսաստանի լայնածավալ հարձակման հնարավորություն։ Դանիլովի խոսքով՝ Կիևն արձանագրում է ռուսական զորքերի տեղաշարժը ՌԴ տարածքում, սակայն դա անակնկալ չէ։
Ուկրաինայի պաշտպանության նախարար Ալեքսեյ Ռեզնիկովն իր հերթին նշել է, որ այս պահին ռուսական զինված ուժերը չեն ստեղծել որևէ հարվածային ուժ, որը ցույց կտար Ուկրաինա ներխուժման պլանավորումը։
Տաթև Ֆռանգյան
