Քաղաքականություն
25.01.2022 | 16:16
Հավաքական անվտանգության պայմանագրի կազմակերպության նախկին գլխավոր քարտուղար Նիկոլա Բորդյուժան այսօր կազմակերպված տեսակամուրջի ժամանակ պատասխանել է հարցին, թե ո՞ր դեպքում հայ-ադրբեջանական սահմանին տիրող իրավիճակում Հայաստանը կարող է հույսը դնել ՀԱՊԿ-ի նույնքան օպերատիվ միջամտության վրա, որքան տեղի ունեցավ Ղազախստանի իրադարձությունների պարագայում։
Ի պատասխան՝ Բորդյուժան նշել է, որ խորապես գիտի ղարաբաղյան հակամարտության և սահմանային խնդիրը, երկար տարիներ զբաղվել է դրանով, բայց ՀԱՊԿ-ի նույն արձագանքի մասին չէր խոսի, ինչ Ղազախստանի դեպքում։
«Ես կխոսեի Հայաստանին և Ադրբեջանին ճանաչված սահմանների հաստատման հարցում աջակցելու անհրաժեշտության մասին: Իսկ դա նշանակում է համատեղ խմբերի ստեղծում, նշանակում է արխիվներից նյութերի, տարբեր տարիների քարտեզների տրամադրում, այդ թվում՝ Ռուսաստանից»,- ասել է Բորդյուժան՝ կարծիք հայտնելով, որ սահմանների սահմանազատումը կբացառեր զինված բախումներն ու փոխհրաձագությունը։
ՀԱՊԿ նախկին ղեկավարը հիշեցրել է, որ սահմանազատման և սահմանագծման նման խմբեր Ռուսաստանը ժամանակին ստեղծել է Չինաստանի և Ղազախստանի հետ։ Եղեել են վիճելի տարածքներ, կրքերի սրվածություն, այնուամենայնիվ, կողմերին հաջողվել է դիվանագիտական մեթոդներով գտնել փոխընդունելի լուծումներ։
«Չեմ կարծում, որ այս փուլում կարելի է խոսել կամ մշակել ՀԱՊԿ զորքերի տեղակայման հետ կապված հարցեր։ Ռուս խաղաղապահների առկայությունը Ղարաբաղում կայունության երաշխիք է, թեև միջադեպեր էլ են գրանցվում։ Հետևում եմ գործընթացներին և նույնքան անհանգստանում եմ կայունության համար»,- նշել է նա։
Տաթև Ֆռանգյան
