10.10.2026 | 19:47
Քննարկվել են Հայաստանում կախվածությունների կանխարգելման և բուժման ուղղությամբ իրականացվող աշխատանքները
Սուրեն Պապիկյանն ու Տիգրան Ավինյանը չեն ՔՊ-ացնելու բուհերը, այլ արմատախիլ անելու կուսակցականացումը. ՏԵՍԱՆՅՈւԹ
Քաղաքականություն
24.01.2022 | 22:12
Հայաստանի կառավարությունը շարունակում է հավատարիմ մնալ բուհերն ապաքաղաքական դարձնելու իր խոստմանը: Այս մասին ԶԼՄ-ների և հասարակական կազմակերպությունների ներկայացուցիչների համար կազմակերպված առցանց ասուլիսի շրջանակում նշեց Հայաստանի վարչապետ Նիկոլ Փաշինյանը:
«2018 թվականին ես արձանագրում եմ արել, և մենք ճշգրիտ այդ խոստումը պահել ենք: Բայց սա միամիտների երեկո չէ: 2020 թվականի նոյեմբերին հանկարծ պարզվեց, որ բուհերում շատ լայն շրջանակներ ծոցագրպանում կուսակցական տոմսերը պահել են և պատեհ առիթի էին սպասում, որ այդ տոմսերը բարձրացնեն և Հայաստանի ամբողջ բուհական համակարգը դարձնեն կուսակցական բջիջներ՝ փորձ անելով ուսանողությանը ներքաշել ներքաղաքական ինչ-որ ինտրիգների մեջ: Այս ամեն ինչը պետք է արձագանք ստանա: Չենք կարող չնկատել այն խայտառակ իրադրությունը, որ 2020 թվականի նոյեմբերից հետո ունեինք բուհերում, երբ կոնկրետ բուհական շրջանակներ դարձել էին կոնկրետ քաղաքական ուժերի պրոպագանդիստներ: Այո, մենք հեղափոխությունից հետո ասել էինք, որ բոլորին հնարավորություն ենք տալու: Բայց երբ դա օգտագործվում է պետության դեմ, մենք չենք կարող ուղղակի աչք փակել»,- նշեց Փաշինյանը:
Անդրադառնալով ԵՊՀ կառավարման խորհրդի նախագահի պաշտոնը «Քաղաքացիական պայմանագիր» կուսակցության վարչության նախագահ, պաշտպանության նախարար Սուրեն Պապիկյանի զբաղեցնելու փաստին՝ վարչապետը հայտարարեց, որ այդ որոշումն ինքն է կայացրել:
«Բայց սուրեն Պապիկյանը չի գնացել այնտեղ բուհերը ՔՊ-ացնելու, ինչպես նաև ինչպես նաև Տիգրան Ավինյանը, ընդհակառակը, մենք գնացել ենք, որպեսզի բուհերին պաշտպանենք կուսակցականացումից, որովհետև մենք տեսանք, որ մեր թավշե տրամադրվածությունը շատերը փորձում են օգտագործել որպես միամտություն: Մենք խոստումը պահելու համար ենք որոշումները կայացրել՝ զերծ պահելու բուհերը կուսակցականացումից: Մեր գործընկերները, որ գնացել են բուհեր, գնացել են հենց այդ հանձնարարությամբ՝ բուհերից արմատախիլ անելու բոլոր կուսակցական, կոռուպցիոն երևույթները: Դրա համար մենք մանդատ ենք ստացել: Մենք խոստացել ենք մարդկանց, որ թավշյա մանդատը փոխարինելու ենք պողպատե մանդատով»,- նշեց Փաշինյանը:
Մանրամասները՝ տեսանյութում:
