05.03.2026 | 17:00
133 հազար վճարողը կվճարի 43 հազար դրամ․ էլեկտրամոբիլների գույքահարկը ապրիլի 1-ից կնվազի
ՌԴ-ն և Ուկրաինան ջերմորեն են վերաբերվում Թուրքիայի միջնորդությանը. Reuters
Քաղաքականություն
21.01.2022 | 15:40
Ե՛վ Ռուսաստանը, և՛ Ուկրաինան բաց են Թուրքիայի միջնորդության համար՝ երկու երկրների միջև լարվածության նվազման նպատակով, ինչը դեռ նոյեմբերին առաջարկվել է Անկարայի կողմից։ Այս մասին Reuters-ին հայտնել է թուրքական դիվանագիտական աղբյուրը։
Թուրքիան նաև բանակցություններ է վարում՝ ԵԱՀԿ Մինսկի խմբի հաջորդ հանդիպումը հյուրընկալելու համար, որի ընթացքում քննարկվելու է Դոնբասի հարցը։ Այս մասին լրատվամիջոցին անանունության պայմանով հայտնել են աղբյուրները։
Դեռևս որևէ ամսաթիվ չի նշվում Ստամբուլի հանդիպման համար, սակայն ակնկալվում է Ռուսաստանի, Ուկրաինայի և Մինսկի խմբի ու Դոնբասի ներկայացուցիչների մասնակցությունը։
Կրեմլի խոսնակ Դմիտրի Պեսկովն իր հերթին ՌԻԱ Նովոստիին հայտնել է, որ նման հանդիպման նախապատրաստություն չկա։
Արևմտյան երկրները ենթադրում են, որ Ռուսաստանը նոր հարձակում է պատրաստում Ուկրաինայի դեմ, ինչը Մոսկվան հերքում է։
«Ե՛վ Ռուսաստանը, և՛ Ուկրաինան ջերմորեն են վերաբերվում Թուրքիայի միջնորդությանը»,- ասել է գործակալության աղբյուրը։
Թուրքիան լավ հարաբերություններ ունի Կիևի և Մոսկվայի հետ, սակայն դեմ է Ռուսաստանի քաղաքականությանը Սիրիայում և Լիբիայում, ինչպես նաև Ղրիմի բռնակցմանը։
Ուկրաինան ավելի վաղ ողջունել էր Թուրքիայի ներգրավվածությունը բանակցություններում։ Զելենսկին նոյեմբերին ասել էր, որ խնդրել է Էրդողանին՝ Պուտինին փոխանցել բանտարկյալների ցուցակը՝ հնարավոր փոխանակման համար։ Ուկրաինան նաև Թուրքիայից անօդաչու թռրող սարքեր է գնել, ինչը Մոսկվայի դժգոհությունն է հարուցել։
Թուրքիան երկու ամիս առաջ ասել էր, որ պատրաստ է միջնորդ լինել երկու երկրների միջև ճգնաժամը հաղթահարելու հարցում, ինչն այն ժամանակ Մոսկվան մերժեց։
Էմմա Չոբանյան
