18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ԱՄՆ-ը մեղադրանք է առաջադրել չորս բելառուսների՝ Ryanair-ի ինքնաթիռի հարկադիր վայրէջքի գործով
Քաղաքականություն
21.01.2022 | 15:31
Միացյալ Նահանգների դատական իշխանությունները մեղադրանք են առաջադրել Բելառուսի չորս քաղաքացիների՝ անցյալ տարի Ryanair ավիաընկերության ինքնաթիռի հարկադիր վայրէջքի գործով։ Այս մասին հայտնել է ԱՄՆ Արդարադատության նախարարությունը։
«Բելառուս պաշտոնյաները կեղծել են սպառնալիքի մասին տվյալները, որպեսզի ստիպեն ինքնաթիռին փոխել երթուղին և վայրէջք կատարել Մինսկում՝ Վիլնյուսի փոխարեն: Ինքնաթիռը Մինսկ վերաուղարկելու նպատակը բելառուս լրագրողին և քաղաքական ակտիվիստին ձերբակալելն էր»,- պարզաբանել են նախարարությունից։
ԱՄՆ Արդարադատության նախարարությունը «օդային ծովահենության» մեղադրանք է առաջադրել «Բելաէրոնավիգացիայի» ղեկավար Լեոնիդ Չուրոյին, նրա տեղակալ Օլեգ Կազյուչիցին և Բելառուսի հատուկ ծառայությունների երկու աշխատակցի։ Չորսն էլ, ինչպես նշում են լրատվամիջոցները, այժմ Բելառուսի տարածքում են։
Հիշեցնենք՝ անցած տարվա մայիսի 23-ին Բելառուսի օդային տարածքում երկրի ռազմաօդային ուժերը, հայտարարելով, թե ինքնաթիռում տեղադրված ռումբի մասին տեղեկություն են ստացել, ստիպել են Աթենք-Վիլնյուս կանոնավոր չվերթն իրականացնող Ryanair ավիաընկերության օդանավին վայրէջք կատարել Մինսկի միջազգային օդանավակայանում՝ ընդդիմադիր լրագրող և բլոգեր Ռոման Պրոտասևիչի ձերբակալության նպատակով։
Հունվարի սկզբին Քաղաքացիական ավիացիայի միջազգային կազմակերպությունը (ICAO) եզրակացրել է, որ Ryanair ավիաընկերության ինքնաթիռում ռումբի մասին հաղորդագրությունը, որը անձնակազմին ստիպել էր վայրէջք կատարել Մինսկում անցյալ տարվա մայիսին, կեղծ է եղել:
Տաթև Ֆռանգյան
