29.07.2026 | 12:34
ՔՊ-ին սատարելու համար 61-ամյա քաղաքացուն թիրախավորած անձի գործն ուղարկվել է դատարան
Իրանը դադարեցրել է Թուրքիա գազի մատակարարումները․ ՋԷԿ-երին կարգադրվել է կրճատել վառելիքի սպառումը
Քաղաքականություն
20.01.2022 | 17:04
Իրանը մինչև 10 օրով դադարեցրել է բնական գազի մատակարարումը Թուրքիա՝ «տեխնիկական անսարքության» պատճառով, ինչի հետևանքով թուրքական իշխանությունները կարգադրել են տեղական ջերմաէլեկտրակայաններին՝ 40 տոկոսով կրճատել վառելիքի սպառումը։ Այս մասին հաղորդում է Reuters-ը՝ վկայակոչելով գազի ոլորտում երկրի ներկայացուցիչներին։
Գործակալության աղբյուրները հայտնել են, որ թուրքական բնական գազի մատակարարներին խնդրել են մինչև 60 տոկոսով կրճատել մատակարարումները խոշոր սպառողների համար՝ բացառությամբ ջեռուցման համար օգտագործվողների, ինչպես նաև հավելել, որ դպրոցներին ու հիվանդանոցներին գազ կմատակարարեն սովորական ռեժիմով։
Իրանը Թուրքիային ծանուցել է գազի մատակարարումը 10 օրով դադարեցնելու մասին, սակայն երկնագույն վառելիքի մատակարարումներն ավելի վաղ վերսկսելու շուրջ բանակցությունները շարունակվում են, ասել են աղբյուրները:
Թուրքիան գրեթե ամբողջությամբ կախված է Ռուսաստանից, Ադրբեջանից և Իրանից գազի ներկրումից։ Ըստ վերջին պաշտոնական տվյալների՝ միայն Իրանը 2021 թվականի առաջին տասը ամիսներին ապահովել է Թուրքիայի բնական գազի կարիքների 16 տոկոսը։
Թուրքիայում էներգակիրների գները կտրուկ աճել են համաշխարհային գների աճի և անցյալ տարի դոլարի նկատմամբ ազգային արժույթի 44 տոկոս արժեզրկման պատճառով։
Հիշեցնենք, որ այս շաբաթվա սկզբին պայթյուն էր տեղի ունեցել Իրաքից դեպի Թուրքիա գնացող Քիրքուք-Ջեյհան նավթամուղի վրա, որից հետո դադարեցվել էր նավթի մատակարարումը։
Տաթև Ֆռանգյան
