Փաշինյանին հիշեցրին պատգամավոր եղած ժամանակ ՀԱՊԿ-ի և Բրյուս Լիի միջև տարած համեմատականի մասին. ՏԵՍԱՆՅՈւԹ

«Հայաստան» խմբակցության պատգամավոր Ագնեսա Խամոյանը ԱԺ- Կառավարություն հարցուպատասխանի ժամանակ միացրեց ձայնագրություն, որտեղ տարիներ առաջ ընդդիմադիր եղած ժամանակ Նիկոլ Փաշինյանը ԱԺ հանձնաժողովում հայտարարություններ է արել՝ համեմատական անցկացնելով ՀԱՊԿ-ի և Բրյուս Լիի միջև, ինչպես նաև կոչ է անում մեր երկրի անվտանգության ապահովման համար այլ կազմակերպություններ և միջոցներ փնտրել, կասկածի տակ է դնում ոչ միայն կազմակերպության արդյունավետությունը, այլև ՀԱՊԿ անդամ երկրների հետ ՀՀ հարաբերությունները, մասնավորապես Ղազախստանի։

Ի պատասխան՝ վարչապետ Նիկոլ Փաշինյանը նշեց, որ ՀԱՊԿ-ի պատմության մեջ առաջին անգամ գործել է արագ արձագանքման մեխանիզմը և ՀԱՊԿ զորքեր են ուղարկվել Ղազախստան:

«Մենք ասել ենք, որ ՀԱՊԿ-ում մեր առաջնահերթությունը, այդ թվում՝ նախագահության ժամկետում մեր առաջնահերթությունը, ՀԱՊԿ-ի արագ արձագանքման ճգնաժամային իրավիճակներին արձագանքման մեխանիզմների կատարելագործումն է, որպեսզի հասկանանք՝ այդտեղ աշխատող մեխանիզմ կա՞, թե՞ չկա:

Երբ որ եկել է պահը, որ մենք պետք է գործողություն ձեռնարկեինք մեր ամբողջ օրակարգի վերաբերյալ, այո՛, ես կայացրել եմ որոշում, իհարկե, ՀԱՊԿ մեր մյուս գործընկերների հետ, և առաջին անգամ ՀԱՊԿ-ի պատմության մեջ գործել է արագ արձագանքման մեխանիզմ: Լա՞վ է սա Հայաստանի շահերի համար, թե՞ վատ է. իհարկե, լավ է: Արդյոք սրանով բոլոր հարցերի պատասխանները տրվա՞ծ են. ո՛չ, տրված չեն»:

«Փաստորեն ՀԱՊԿ-ի Բրյուս Լին դո՞ւք եք, ժամանակին ՀԱՊԿ-ը դուք համեմատել էիք Բրյուս Լիի հետ»,- արձագանքեց Խամոյանը և հետաքրքրվեց, թե ինչու՞ Նիկոլ Փաշինյանը չի դիմել ՀԱՊԿ-ին, որպեսզի ադրբեջանցի զինվորականները դուրս բերվեն ՀՀ սուվերեն տարածքից:

«Ինչպես գիտեք, Բրյուս Լին մի հատ է եղել և ՀԱՊԿ-ում չի եղել: Բայց ինչպես ամբողջ Հայաստանում, այնպես էլ ալամ ՀԱՊԿ-ում եղել է մի տղամարդ , որի կարգավիճակը նույնիսկ իր կողմնակիցներն են հիմա կասկածի տակ դնում: Մենք այդպիսի հավակնություններ չունենք:

Ինչ վերաբերում է Հայաստան-ՀԱՊԿ հետագա հարաբերություններին, ապա, վարչապետի խոսքով, ՀՀ կառավարությունն ունի բավարար լիազորություններ՝ անհրաժեշտության դեպքում և ըստ նպատակահարմարության կայացնել որոշումներ, և այն դեպքերում, երբ նպատակահարմար չէ, արդյունավետ չի լինի այդ որոշումը, չկայացնել դրանք»,- նշեց Փաշինյանը:

Մանրամասները՝ տեսանյութում: