15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Կիևի դատարանը Պորոշենկոյի նկատմամբ խափանման միջոց է ընտրել
Քաղաքականություն
19.01.2022 | 17:46
Կիևի Պեչերսկի դատարանը որոշել է չկալանավորել Ուկրաինայի հինգերորդ նախագահ Պետրո Պորոշենկոյին, սակայն նրան ազատ է արձակել՝ առաջին իսկ պահանջով դատարան կամ հարցաքննության ներկայանալու անձնական պարտավորությամբ, գրում է BBC-ի ռուսական ծառայությունը։
Իշխանությունները Պորոշենկոյին մեղադրում են դավաճանության մեջ, սակայն նա պնդում է, որ իրեն՝ որպես ընդդիմության առաջնորդի, հետապնդում են քաղաքական դրդապատճառներով։
Այսպիսով, դատարանը մերժել է Ուկրաինայի իրավապահ մարմինների պահանջը՝ Պորոշենկոյին կալանավորել կամ ազատ արձակել 1 միլիարդ գրիվնա (մոտ 36 միլիոն դոլար) գրավի դիմաց. Ուկրաինայի օրենսդրության համաձայն՝ նրանք պարտավոր են առաջարկել ոչ միայն կալանք, այլև այլընտրանքային խափանման միջոց, որն ազատությունից զրկելու հետ կապված չի լինի։
Բացի այդ, Ուկրաինայում պետական դավաճանության հոդվածը չի նախատեսում մեղադրյալի պարտադիր ազատազրկում։
Դատարանի որոշմամբ՝ Պորոշենկոն պարտավոր է չլքել Կիևի շրջանը և ի պահ հանձնել անձնագիրը։ Ի պատասխան այս որոշման՝ նախկին նախագահն ասել է, որ մոտ ապագայում ծրագրել է առնվազն երեք այց արտասահման, իսկ Կիևից հեռանալու արգելքը կխոչընդոտի իր քաղաքական գործունեությանը։ Պորոշենկոյի փաստաբանները հայտարարել են, որ մտադիր են վիճարկել Պեչերսկի դատարանի որոշումը։
Պետրո Պորոշենկոյի դեմ դավաճանության մեղադրանքով քրեական գործ է հարուցվել անցյալ տարի։ Մեղադրող կողմի կարծիքով՝ Ուկրաինայի համար 2014-2015 թվականների շատ դաժան ձմռանը նախկին նախագահը խզել է Հարավային Աֆրիկայի հետ ածխի մատակարարման պայմանագիրը և նոր պայմանագիր կնքել՝ ինքնահռչակ Դոնեցկի և Լուգանսկի ինքնահռչակ հանրապետություններից մատակարարների հետ։
Տաթև Ֆռանգյան
