ՌԴ-ի և Իրանի համագործակցությունը կնպաստի տարածաշրջանային անվտանգությանը․ Ռաիսի

Իրանի նախագահ Էբրահիմ Ռաիսին, Ռուսաստան իր այցը բնութագրելով որպես Թեհրանի և Մոսկվայի միջև կապերի խթանման կարևորագույն փուլ, հայտարարել է, որ երկու երկրների միջև համագործակցությունն ու երկխոսությունը կնպաստեն տարածաշրջանային անվտանգությանը, գրում է Tasnim news agency-ն:

Այսօր առավոտյան Թեհրանից Մոսկվա մեկնելուց առաջ լրագրողների հետ զրույցում Ռաիսին ասել է, որ այց կատարում է իր ռուս գործընկերոջ հրավերով՝ բարիդրացիության և տարածաշրջանային դիվանագիտության ամրապնդման նպատակով։

«Այս ուղևորությունը կարող է շրջադարձային լինել Ռուսաստանի հետ հարաբերությունների խթանման և ամրապնդման գործում»,- նշել է Իրանի ղեկավարը՝ ընդգծելով Թեհրանի ջանքերը բոլոր հարևանների, հատկապես՝ Ռուսաստանի հետ քաղաքական, տնտեսական և առևտրային ոլորտներում կապերի զարգացման համար:

Իրանը անկախ, հզոր և ազդեցիկ երկիր է տարածաշրջանում, մինչդեռ Ռուսաստանը նույնպես խոշոր և հզոր պետություն է տարածաշրջանում, նշել է Ռաիսին՝ հավելելով. «Հզոր և ազդեցություն ունեցող երկու կարևոր երկրների միջև համագործակցությունն ու երկխոսությունը կարող է նպաստել տարածաշրջանային անվտանգության, ինչպես նաև տնտեսական և առևտրային կապերի խթանմանը»:

Նա նաև նշել է, որ Ռուսաստանն առանցքային դեր է խաղում Եվրասիական տնտեսական միությունում, իսկ այդ միության շրջանակում Թեհրանի և Մոսկվայի համագործակցությունը կընդլայնի տնտեսական և առևտրային գործունեությունը։

Ռաիսին ասել է, որ Իրանի և Ռուսաստանի ընդհանուր շահերը և նրանց փոխգործակցությունը կապահովեն անվտանգությունը տարածաշրջանում և կհակազդեն միակողմանիությանը աշխարհում։

«Ավելին, երկու երկրների փոխգործակցությունն ու համագործակցությունը կարող են ազդել տարածաշրջանային և միջազգային իրավիճակի վրա»,- նշել է նա։

Տաթև Ֆռանգյան