Ադրբեջանցիները տարին մեկ անգամ կարող են այցելել Արցախի գրավյալ տարածքներ։ Տեղական լրատվամիջոցների հաղորդմամբ՝ այս մասին հայտարարել է Ադրբեջանի Ավբոմոբիլային տրանսպորտի պետական ծառայության ղեկավար Անար Ռզաևը։
Այցերը հնարավոր է իրականացնել միայն ուղևորատար ավտոբուսներով, ուղևորներն էլ կարող են ապահովագրվել դժբախտ դեպքերից։ Պաշտոնյան նշել է, որ որոշ մարդիկ կարող են անվճար այցելել Արցախի գրավյալ տարածքներ (պատերազմի մասնակիցներն ու հաշմանդամ դարձածները, զոհվածների ընտանիքների անդամները), մյուսները պետք է վճարեն, ինչն այնքան էլ էժան չի լինի։
Բաքու-Շուշի-Բաքու երթուղու արժեքը 10․4 մանաթ է, Բաքու-Ակնա-Բաքու՝ 9․4, Ահմեդբեյլի-Շուշի-Ահմեդբեյլի՝ 7, Բարդա-Ակնա-Բարդա՝ 5 մանաթ, Վանարդայի օդանավակայանից Շուշի՝ 6 մանաթ։ Ահմեդբեյլի-Շուշի ավտոբուսային ուղևորափոխադրումներն իրականացվելու են շաբաթական 4 անգամ, մյուս երթուղիներով՝ երկու անգամ։
Ավտոբուսներն ուղևորվելու են ոստիկանների ուղեկցությամբ․ յուրաքանչյուր ավտոբուսում լինելու է ոստիկանության աշխատակից։
Բացի այդ, թվային զարգացման ու տրանսպորտի փոխնախարար Ռահման Գումետովը հայտարարել է, որ ներկա փուլում միայն Ադրբեջանի քաղաքացիները կարող են այցելել Արցախի գրավյալ տարածքներ։ Նա նշել է, որ անվտանգության նկատառումներից ելնելով՝ այցելուներին չի թույլատրվի գիշերել այնտեղ, նրանք կկարողանան մի քանի ժամ միայն անցկացնել։
Ավելի վաղ տեղեկացրել էինք, որ Ադրբեջանը պատրաստվում է հունվարից 24-ից առաջին կանոնավոր ավտոբուսային երթուղիները գործարկել դեպի Արցախի գրավյալ տարածքներ։
Էմմա Չոբանյան
