Արցախից տեղահանվածներից ովքեր կարող են տուն ստանալ Հայաստանում, ովքեր՝ Արցախում․ ԱՀ պետնախարար. ՏԵՍԱՆՅՈՒԹ

«Առաջիկա շաբաթբերին տրամադրելու ենք 200-ից ավելի նոր բնակարաններ»,- այս մասին ամենամյա ամփոփիչ ասուլիսի ժամանակ հայտնեց ԱՀ պետնախարար Արտակ Բեգլարյանը:

«Այս պահին մենք Արցախի հանրապետությունում ունենք շուրջ 15-16 հազար տեղահանված անձ։ Հիմնական մասը ժամանակավոր կացարաններում կամ վարձով բնակվում են, կամ պետության կողմից ապահովված հյուրատներում, հյուրանոցներում, կամ փոքր մասը արդեն բնակարան է ստացել։ Տարեվերջին մենք տրամադրել ենք 108 բնակարան, որոնք կառուցվել են Հայաստան Համահայկական Հիմնադրամ միջոցներով, առաջիկա շաբաթներին տրամադրելու ենք 200-ից ավելի նոր բնակարաններ»,-նշեց Բեգլարյանը:

ԱՀ պետնախարարի խոսքով՝ ազատ բնակֆոնդից անցած տարի 467 բնակարան արդեն պատրաստվել էր՝ չհաշված նորակառույց շենքերը, բնակարանները, որոնց մի մասը տրամադրվել են։

«Այս պահին 2862 բնակարան կառուցման փուլում է գտնվում, որից 956-ը պետական միջոցներով, 743-ը՝ Արցախի ներդրումային հիմնադրամի, 1071-ը՝ Հայաստան Համահայկական Հիմնադրամի,92-ը բարեգործական միջոցներով։ Ընթացքում են համագործակցությունը տարբեր բարերարների հետ։ Հավանաբար մի քանի հարյուր բնակարանների շինարարություն կրկին բարերարների միջոցներով կմեկնարկենք:

Իսկ ՀՀ-ում գտնվող տեղահանված արցախցիների վերաբերյալ Բեգլարյանն ընդգծեց, որ բնակարանների տրամադրմանը զուգահեռ աստիճանաբար ՀՀ-ում տեղակայված և տեղահանված ընտանիքների մի մասը վերադառնում են Արցախ, քանի որ եղած բնակֆոնդի մի մասը ազատվում է՝ վարձով բնակարանները, հյուրատները, հյուրանոցները,- ասաց Արտակ Բեգլարյանը՝ հույս հայտնելով, որ առաջիկա մեկ-երկու տարվա ընթացքում էականորեն, կտրուկ կնվազի ՀՀ-ում գտնվող տեղահանվածների թիվը:

Մանրամասները՝ տեսանյութում։