17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Թուրքիայի ընդդիմադիր քաղաքապետները կողմ են, որ ընտրություններում Էրդողանի մրցակիցը լինեն Ստամբուլի կամ Անկարայի քաղաքապետները
Քաղաքականություն
17.01.2022 | 22:51
Թուրքիայի ընդդիմադիր IYI («Լավ») կուսակցության 19 քաղաքապետների մեծամասնությունը, որոնք հունվարի 17-ին հանդիպել են կուսակցության ղեկավար Մերալ Աքշեներին, նախընտրում են, որ Անկարայի քաղաքապետ Մանսուր Յավաշը կամ Ստամբուլի քաղաքապետ Էքրեմ Իմամօղլուն 2023 թվականի նախագահական ընտրություններում թեկնածու լինեն։ Որոշներն էլ հայտնել են, որ սատարում են Աքշեներին, գրում է Duvar-ը։
Նշվում է, որ Աքշեները քաղաքապետներին հրավիրել է կուսակցության շտաբ՝ պարզելու, թե ինչ խնդիրների են բախվում, այդ թվում՝ նվազագույն աշխատավարձի և առաջիկա ընտրությունների մասով։
Աքշեները քաղաքապետներին հորդորել է «հեռու մնալ քաղաքական պայքարից»։ Նա, միաժամանակ, ասել է, որ պատրաստ է առաջադրվել նախագահի թեկնածու։
«Կառավարությունը մաշված է։ Թուրքիան կարգավորման կարիք ունի։ Մենք կարող ենք հասնել նախագահական թեկնածուի ընտրության, որը հետ կբերի խորհրդարանական համակարգը»,- ասել է նա։
Հավելենք, որ Ստամբուլի քաղաքապետ Էքրեմ Իմամօղլուն Անկարայի քաղաքապետ Մանսուր Յավաշի հետ, ըստ տարբեր փորձագետների, Էրդողանի գլխավոր մրցակիցն է 2023 թվականին կայանալիք նախագահական ընտրություններում։ Վերջին սոցհարցումների տվյալներով՝ նրանք առաջ են անցնում Թուրքիայի գործող նախագահ Ռեջեփ Թայիփ Էրդողանից։
Էմմա Չոբանյան
