09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Մյանմարի նախկին ղեկավար Աուն Սան Սու Չժիին սպառնում է մինչև 164 տարվա ազատազրկում
Քաղաքականություն
17.01.2022 | 22:42
Մյանմարի ղեկավարումից հեռացված պետական խորհրդական Աուն Սան Սու Չժիին սպառնում է մինչև 164 տարվա ազատազրկում այն բանից հետո, երբ նրան կոռուպցիայի մեջ 5 նոր մեղադրանք է առաջադրվել զինվորականների կողմից։ Այս մասին հայտնում է The Irrawaddy պարբերականը։
Աղբյուրի փոխանցմամբ՝ հունվարի 14-ին առաջադրված նոր մեղադրանքները կապված են Աուն Սան Սու Չժիի կառավարության կողմից աղետների կառավարման և այլ կարիքների համար ուղղաթիռի վարձակալության ու գնման հետ։ Յուրաքանչյուր կոռուպցիոն մեղադրանք ենթադրում է մինչև 15 տարվա ազատազրկում։ Նմանատիպ հինգ մեղադրանք է առաջադրվել նաև նախագահ Ուին Մայնթի դեմ:
Պարբերականը հիշեցնում է, որ սեպտեմբերից զինվորականներն արգելել են Աուն Սան Սու Չժիի բոլոր հինգ փաստաբաններին շփվել լրատվամիջոցների հետ, ուստի դատական նիստերի ընթացքի և նախկին պետական խորհրդականի գտնվելու վայրի մասին տեղեկություններ չկան։
2021 թվականի դեկտեմբերի սկզբին Աուն Սան Սու Չժին դատապարտվեց երկու տարվա ազատազրկման՝ բանակի դեմ ատելություն սերմանելու և կորոնավիրուսի կանխարգելման հետ կապված կանոնակարգերը խախտելու համար։ Այս տարվա հունվարի 10-ին Մյանմարի դատարանը նախկին պետական խորհրդականին դատապարտել էր ևս չորս տարվա ազատազրկման։ Նախկինում նրա դեմ քրեական գործ է հարուցվել մի շարք այլ մեղադրանքներով, այդ թվում՝ բնական աղետների հետևանքների մասին օրենքը խախտելու, ինչպես նաև կոռուպցիայի համար։
2021 թվականի փետրվարի 1-ին Մյանմարի զինվորականները երկրում մեկ տարով արտակարգ դրություն են հայտարարել և ղեկավարությանը հեռացրել իշխանությունից։ Բանակի ներկայացուցիչները հայտարարել էին լայնածավալ կեղծիքների մասին 2020 թվականի նոյեմբերին կայացած խորհրդարանական ընտրությունների ընթացքում, որոնց արդյունքում հաղթել է Աուն Սան Սու Չժիի «Հանուն ժողովրդավարության ազգային լիգան»։ Փետրվարի սկզբից երկրում շարունակվում են բողոքի ցույցերը՝ ընդդեմ քաղաքացիական իշխանության տապալման։
Տաթև Ֆռանգյան
