14.12.2024 | 19:57
Ինչ իրավիճակ է ճանապարհներին 19։35-ի դրությամբ
Էրդողանը հայտարարել է, որ ԵՄ-ին անդամակցությունը մնում է Թուրքիայի ռազմավարական նպատակը
Քաղաքականություն
13.01.2022 | 20:51
Թուրքիան հանդես է գալիս ԵՄ հետ ակտիվ երկխոսության օգտին, սակայն բախվում է Անկարայի հետ համագործակցության բանակցությունների ձգձգմանը, այդ թվում ՝ Թուրքիայի ԵՄ անդամակցությանը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը ԵՄ երկրների դեսպանների հետ հանդիպմանը, գրում է Անադոլու գործակալությունը։
Էրդողանն ասել է, որ ինչպես նախկինում՝ Թուրքիան նպատակ ունի լիրավ անդամակցել ԵՄ-ին։ Նա նաև կոչ է արել կանխել առանձին երկրների փորձերը՝ սաբոտաժի ենթարկել Անկարայի և ԵՄ-ի միջև երկխոսությունը՝ Եվրամիության ներսում «համերաշխություն» ապահովելու պատրվակով։
Էրդողանը Թուրքիան անվանել է «առանցքային երկիր»՝ Եվրոպայում բազմաթիվ խնդիրների լուծման համար։
«Առանց լուծելու Թուրքիայի սահմանների խնդիրները, միգրացիոն ճգնաժամը չի լուծվի։ Յուրաքանչյուրը, որն օբյեկտիվորեն վերլուծում է իրավիճակը Եվրոպայում, գիտակցում և ընդունում է, որ Թուրքիան բանալին է խնդիրների լուծման, որոնց այսօր բախվել են ԵՄ երկրները։ Թուրքիայի շնորհիվ միգրացիոն ճգնաժամի մասշտաբները նվազել են, ինչպես նաև ահաբեկչական վտանգն ու ապակայունացումը»,- ասել է Թուրքիայի նախագահը։
Նա հույս է հայտնել, որ 2022 թվականին ԵՄ-ն ավելի վճռական քայլեր կձեռնարկի Թուրքիայի հետ հարաբերությունների զարգացման ճանապարհին։
Նշենք, որ ԵՄ-ին Թուրքիայի անդամակցության բանակցությունները մեկնարկել են 16 տարի առաջ, սակայն դրանք այժմ սառեցված են։ Յուրաքանչյուր տարի ԵՄ գործադիր մարմինը զեկույց է հրապարակում, թե Անկարան որքանով է կատարել իր պարտավորությունները, որքանով է մոտեցել եվրոպական չափանիշներին:
Վերջին զեկույցում նշվում է, որ Թուրքիայի անդամակցության գործընթացը կանգ է առել՝ ժողովրդավարական լուրջ թերացումնների պատճառով: Սա համարվում է 16 տարիների ընթացքում ամենաքննադատական զեկույցը։
Էմմա Չոբանյան
