29.06.2026 | 11:15
Փոփոխություններ Արցախից տեղահանված ընտանիքների բնակապահովման պետական աջակցության ծրագրում. ՈՒՂԻՂ
Ստամբուլի քաղաքապետարանի աշխատակիցը դատի է տվել Թուրքիայի նախագահին ու ՆԳ նախարարին
Քաղաքականություն
13.01.2022 | 19:46
Ստամբուլի քաղաքապետարաի աշխատակիցներից Նուրի Բաշքապանը դատի է տվել Թուրքիայի նախագահ Ռեջեփ Թայիփ Էրդողանին ու ներքին գործերի նախարար Սուլեյման Սոյլուին՝ քաղաքապետարանի աշխատակիցներին ահաբեկչական կապերի մեջ մեղադրելու համար, գրում է Duvar-ը։
Դեկտեմբերին Թուրքիայի Ներքին գործերի նախարարությունը հայտարարել էր, որ հետաքննություն է սկսվել այն պնդումների կապակցությամբ, որ Ստամբուլի քաղաքապետարանն աշխատանքի է ընդունել «ահաբեկչական կազմակերպությունների» հետ կապ ունեցող անձանց։ Գերատեսչությունը պնդում է, որ քաղաքապետարանի շուրջ 550 աշխատակից կապ ունի ահաբեկչական խմբերի, այդ թվում՝ Քուրդիստանի աշխատավորական կուսակցության հետ։
Դատախազությանն ուղղված իր դիմումի մեջ Նուրի Բաշքապանը նշել է, որ Էրդողանն ու Սոյլուն «անհիմն մեղադրել են իրեն ու քաղաքապետարանի այլ աշխատակիցներին՝ հանրության առաջ նվաստացուցիչ վիրավորանքներ հնչեցրելով»։
«Պարզ է, որ իմ անձնական ու կորպորատիվ իրավունքները հարձակման են ենթարկվել։ Մենք տառապում ենք հոգեբանական շոկից, որին ենթարկվել ենք անհիմն մեղադրանքների պատճառով»,- նշել է Բաշքապանը։
Քաղաքապետարանի աշխատակիցն ընդգծել է, որ և՛ Էրդողանը, և՛ Սոյլուն հանցագործություններ են կատարել, և պահանջել է նրանց հետապնդել։
Նշենք, որ Ստամբուլի քաղաքապետն է գլխավոր ընդդիմադիր Ժողովրդահանրապետական կուսակցության անդամ Էքրեմ Իմամօղլուն, որը 2019 թվականի ընտրություններում հաղթել էր Էրդողանի կուսակցությանը։ Ընտրություններից հետո նա մշտապես գտնվում է Էրդողանի ու նրա կուսակիցների թիրախում, այժմ էլ իշխանությունները նոր արշավ են սկսել Իմամօղլուի և քաղաքապետարանի աշխատակիցների դեմ։
Հավելենք, որ Ստամբուլի քաղաքապետն իր կուսակից, Անկարայի քաղաքապետ Մանսուր Յավաշի հետ, ըստ տարբեր փորձագետների, Էրդողանի գլխավոր մրցակիցն է 2023 թվականին կայանալիք նախագահական ընտրություններում։
Էմմա Չոբանյան
