29.07.2026 | 15:30
Տոկիոյի Օլիմպիական խաղերի մասնակիցն անհետ կորել է Բրազիլիայում
Ղազախստանում իշխանության բռնի զավթման մեղադրանքով ձերբակալվել են Ազգային անվտանգության կոմիտեի նախկին ղեկավարն ու նրա տեղակալը
Քաղաքականություն
13.01.2022 | 17:24
Ղազախստանի Ազգային անվտանգության կոմիտեի (ԱԱԿ) ղեկավարի նախկին տեղակալ Քարիմ Մասիմովը, որը նախկինում կալանավորվել էր պետական դավաճանության կասկածանքով, ձերբակալվել է իշխանության բռնի զավթման և պաշտոնեական դիրքի չարաշահման կասկածանքով։ Այս մասին այսօր հաղորդագրություն է տարածել ԱԱԿ լրատվական ծառայությունը, գրում է DW-ի ռուսական ծառայությունը։
«Ղազախստանի Հանրապետության Ազգային անվտանգության կոմիտեն (ԱԱԿ) շարունակում է պետական դավաճանության գործով քննությունը ԱԱԿ-ի նախկին ղեկավար Քարիմ Մասիմովի նկատմամբ: Այս գործի շրջանակում լրացուցիչ հետաքննություն է սկսվել իշխանության բռնի զավթման և պաշտոնեական դիրքի չարաշահմանն ուղղված գործողությունների փաստերով»,- ասված է հաղորդագրությունում։
Դրա հաամաձայն՝ խոսքը «Ա» հատուկ նշանակության ծառայության ղեկավար Անուար Սադիկուլովի և ԱԱԿ-ի նախագահի տեղակալ Դուալետ Երգոժինի մասին է։ Մասիմովի նկատմամբ դավաճանության գործը բացվել է հունվարի 6-ին, նույն օրը նա բերման է ենթարկվել։ 56-ամյա Մասիմովը Ղազախստանի նախկին վարչապետն է։ Նա այս պաշտոնը զբաղեցրել է 2007-ից 2012 թվականներին և 2014 թվականից մինչև 2015 թվականի ապրիլը։ Այս երկու ժամկետների միջև ընկած ժամանակահատվածում նա ղեկավարել է երկրի նախագահի աշխատակազմը։ Մասիմովը ԱԱԿ-ի նախագահ է նշանակվել 2016 թվականի սեպտեմբերին:
Նրա տեղակալ Անուար Սադիկուլովը 2019 թվականի հունվարին ստանձնել է Հատուկ նշանակության ուժերի «Ա» ծառայության պետի պաշտոնը։
Հունվարի 11-ին նախագահ Կասիմ-Ժոմարտ Տոկաևը կոշտ քննադատության է ենթարկել հատուկ ծառայությունների աշխատանքը երկրում զանգվածային բողոքի ցույցերի ժամանակ և մատնանշել, որ Ղազախստանի որոշ շրջաններում ԱԱԿ-ի ստորաբաժանումների ղեկավարները, չնայած բավարար ռազմական զինանոցին, չեն մասնակցել մարտերի, այլ լքել են ծառայողական շենքերը՝ այնտեղ թողնելով զենք ու գաղտնի փաստաթղթեր։
Տաթև Ֆռանգյան
