10.02.2026 | 22:13
Փաշինյանի հարցազրույցը հանրային հեռուստաընկերությանը․ ՈՒՂԻՂ
Շիրակցի գերիների հարազատները գիշերելու են Կառավարության շենքի դիմաց․ նրանց ոչ ոք չի ընդունել
Հասարակություն
11.01.2022 | 20:38
44-օրյա պատերազմից հետո Հադրութի շրջանից գերեվարված շիրակցի 33 զինծառայողների հարազատներն այսօր՝ ժամը 13։00-ից, Կառավարության շենքի դիմաց են։ Նրանք գործադիրից պահանջում են վերադարձնել գերության մեջ պահվող իրենց հարազատներին։ Հարազատները հստակ պատասխաններ են ակնկալում վարչապետ Նիկոլ Փաշինյանից, սակայն Կառավարության անդամներից որևէ մեկը մինչև այս պահը չի հանդիպել նրանց, նույնիսկ դրա առաջարկը չի եղել։
Ավելի քան մեկ տարի գերության մեջ գտնվող Հայկազ Հովհաննիսյանի եղբայրը՝ Արկադի Հովհաննիսյանը, Factor.am-ին հայտնեց, որ շարունակում են նստացույցը Կառավարության շենքի դիմաց՝ տրամադրելով լուսանկարներ։ Նա նշեց, որ գերատեսչության մոտից կհեռանան միայն այն ժամանակ, երբ իրենց հստակ պատասխաններ տրվեն, եթե ոչ՝ կգիշերեն այնտեղ։
Նշենք, որ գերեվարված զինծառայողների հարազատները պարբերաբար են բողոքի ակցիաներ իրականացնում Կառավարության շենքի դիմաց։ Նրանք նաև հանդիպումներ են ունեցել վարչապետ Նիկոլ Փաշինյանի հետ՝ իրենց որդիների վերադարձի գործընթացը արագացնելու պահանջով։ Նրանց խոսքով՝ վարչապետը ամիսներ առաջ խոստացել է մինչև տարեվերջ գերության մեջ գտնվող բոլոր զինծառայողներին վերադարձնել հայրենիք, բայց մինչ օրս խոստումը չի կատարել։
Հիշեցնենք՝ գերեվարված զինվորների ծնողները Կառավարության շենքի դիմաց էին նաև դեկտեմբերի 31-ին, սակայն այդ անգամ ևս կառավարության ներկայացուցիչների հետ հանդիպում չի եղել և որևէ պատասխան չեն ստացել։
Հավելենք նաև, որ, պաշտոնական տվյալներով, Բաքվի բանտերում պահվում է 44-օրյա պատերազմի ընթացքում և հետո գերեվարված 46 հայ գերի, նրանց թվում եռակողմ հայտարարությունից հետո գերեվարված Խծաբերդի ու Հին Թաղերի 62 պահեսատզորայինների մի մասը։ Վերջիններից 29-ը հայրենիք է վերադարձվել։ Ադրբեջանը հայկական կողմին վերջին անգամ դեկտեմբերի 29-ին է գերիներ փոխանցել․ նրանք նոյեմբերի 16-ի բախումների ժամանակ գերեվարված 5 զինծառայողներն էին, որոնք վերադարձվեցին Հունգարիայի միջնորդությամբ։
Արփի Հակոբյան
