22.08.2026 | 14:44
«Երևանի գիշերները» բացօթյա համերգաշար՝ Երևանի այգիներում
Ճապոնիան և Հարավային Կորեան հայտարարել են ԿԺԴՀ-ի կողմից հերթական հրթիռի արձակման մասին
Քաղաքականություն
11.01.2022 | 21:05
Ըստ Ճապոնիայի և Հարավային Կորեայի՝ ԿԺԴՀ-ի ղեկավարությունը հերթական անգամ հրթիռ է արձակել, ենթադրաբար՝ բալիստիկ։ Դեկտեմբերի 11-ին արձակված հրթիռը թռել է ավելի քան 700 կմ և հասել իր ամենաբարձր կետին՝ 60 կմ, հայտնում է Սեուլում տեղակայված Yonhap լրատվական գործակալությունը՝ վկայակոչելով Հարավային Կորեայի զինված ուժերի շտաբերի պետերի կոմիտեին (CSC), գրում է DW-ի ռուսական ծառայությունը:
Միաժամանակ, հարավկորեական զինվորականների տեղեկությունների համաձայն, հրթիռը հասել է 10 մախ հիպերձայնային թռիչքի արագության (ժամում ավելի քան 12 հազար կմ): Արձակումն իրականացվել է ԿԺԴՀ-ի ներքին մասից Ճապոնական ծովի ուղղությամբ: Ենթադրվում է, որ Փհենյանը կատարելագործված հրթիռ է փորձարկել՝ համեմատած մեկ շաբաթ առաջ արձակվածի հետ։
Իր հերթին Տոկիոյի պաշտպանության նախարարությունը հայտնել է, որ հյուսիսկորեական հրթիռն ընկել է Ճապոնական ծովում՝ Ճապոնիայի բացառիկ տնտեսական գոտուց դուրս։
Գերատեսչության ղեկավար Նոբուո Կիշին ասել է, որ փորձագետները դեռ չեն հաստատել հրթիռի տեսակը և ուսումնասիրում են տեղեկատվությունը։ Ճապոնիայի արտաքին գործերի նախարար Յոշիմասա Հայաշին հայտարարել է, որ Հյուսիսային Կորեայի գործողությունները սպառնում են իր երկրի և ողջ աշխարհի անվտանգությանը։
Տաթև Ֆռանգյան
