19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Շախմատ. մեկնարկել է Անդրանիկ Մարգարյանի 12-րդ հուշամրցաշարը
10.01.2022 | 12:43
Հունվարի 8-ին Հայաստանի շախմատի ակադեմիայում մեկնարկել է Անդրանիկ Մարգարյանի 12-րդ հուշամրցաշարը, որի շրջանակում արդեն անցկացվել է կայծակնային շախմատի մրցաշարը. տեղեկացնում են ԿԳՄՍՆ-ից:
Համառ պայքարից հետո կայծակնային շախմատի մրցաշարի հաղթող է ճանաչվել Եվրոպայի մինչև 16 տարեկանների արագ շախմատի չեմպիոն Էմին Օհանյանը: Նա 9 հնարավորից վաստակել է 8 միավոր՝ տոնելով 8 հաղթանակ և կրելով մեկ պարտություն: Պատանի շախմատիստը մրցաշարի ընթացքում կարողացել է հաղթել գրոսմայստերներ Շանթ Սարգսյանին և Աննա Սարգսյանին, ինչպես նաև միջազգային վարպետ Մամիկոն Ղարիբյանին: Հայաստանի հավաքականի անդամ Շանթ Սարգսյանը զբաղեցրել է երկրորդ հորիզոնականը, իսկ Մամիկոն Ղարիբյանը եզրափակել է լավագույն եռյակը:
Սահմանվել են նաև հատուկ մրցանակներ. լավագույն արդյունք ցույց տված շախմատիստուհի է ճանաչվել Անահիտ Մուրադյանը, լավագույն արդյունք ցույց տված կարգային մասնակից՝ Արեն Մնացականյանը, լավագույն արդյունք ցույց տված մինչև 12 տարեկան մասնակից՝ Աշոտ Սանթրոսյանը, իսկ լավագույն արդյունք ցույց տված մինչև 10 տարեկան մասնակից՝ Վաչե Քոչարյանը:
Անդրանիկ Մարգարյանի 12-րդ հուշամրցաշարին մասնակցում են շուրջ 430 պատանիներ և աղջիկներ Հայաստանի Հանրապետության բոլոր մարզերից, ինչպես նաև Արցախի Հանրապետությունից:
Մրցաշարին մասնակցում են մինչև 18 տարեկան պատանիներ և աղջիկներ հետևյալ տարիքային խմբերով.
Ա-5 մրցաշար – մինչև 8 տարեկան պատանիներ,
Ա-4 մրցաշար – մինչև 10 տարեկան պատանիներ,
Ա-3 մրցաշար – մինչև 12 տարեկան պատանիներ,
Ա-2 մրցաշար – մինչև 14 տարեկան պատանիներ և աղջիկներ,
Ա-1 մրցաշար – մինչև 18 տարեկան պատանիներ և աղջիկներ,
Բ մրցաշար – մինչև 12 տարեկան աղջիկներ:
Նշենք՝ հիմնական մրցաշարում սահմանված է միջազգային գրոսմայստերի նորմա. այստեղ ուժերն է չափում 10 ուժեղագույն շախմատիստ, ովքեր հաղթողին կորոշեն շրջանաձև մրցակարգով: Հայաստանի 5 ներկայացուցիչներից միայն գրոսմայստեր Հովիկ Հայրապետյանն է հաղթանակ տարել մեկնարկում՝ առավելության հասնելով իրանցի միջազգային վարպետ Ջավադ Ալավի Սայեդի նկատմամբ:
Հուշամրցաշարը կանցկացվի տարբեր տարիքային խմբերով, շվեյցարական մրցակարգով, 9 խաղափուլով: Ժամակարգը` 90 րոպե մինչև խաղի ավարտը (յուրաքանչյուր քայլի համար 30 վայրկյան հավելումով):
Հուշամրցաշարի մրցանակային ֆոնդը կազմում է 2 500 000 ՀՀ դրամ: Մրցաշարը կավարտվի հունվարի 16-ին:
