29.06.2026 | 09:39
Այրված մեքենայում հայտնաբերվել է երեք քաղաքացու այրված դի․ ՃՏՊ Սուրենավանի մոտակայքում
Ղազախստանի Ազգային անվտանգության կոմիտեի նախկին ղեկավարը ձերբակալվել է պետական դավաճանության կասկածանքով. ՏԱՍՍ
Քաղաքականություն
08.01.2022 | 11:02
Ղազախստանի հատուկ ծառայությունները պետական դավաճանության կասկածանքով ձերբակալել են հանրապետության Ազգային անվտանգության կոմիտեի նախկին նախագահ Քարիմ Մասիմովին։ Այս մասին շաբաթ օրը հայտնել է Ղազախստանի ազգային անվտանգության կոմիտեի մամուլի ծառայությունը․փոխանցում է ՏԱՍՍ-ը:
«Այս տարվա հունվարի 6-ին Ազգային անվտանգության կոմիտեն նախաքննություն է սկսել պետական դավաճանության դեպքի առթիվ՝ Ղազախստանի Հանրապետության քրեական օրենսգրքի 175-րդ հոդվածի 1-ին մասով։ ԱԱԿ-ի նախկին նախագահ Քարիմ Մասիմովը և մյուսները բերման են ենթարկվել և տեղափոխվել ժամանակավոր պահման վայր»,- ասվում է հաղորդագրության մեջ։
Հունվարի 5-ին Ղազախստանի նախագահ Կասիմ-Ժոմարտ Տոկաևը Քարիմ Մասիմովին ազատել էր հանրապետության Ազգային անվտանգության կոմիտեի նախագահի պաշտոնից և այդ պաշտոնում նշանակել Պետական անվտանգության ծառայության նախկին ղեկավար Երմեկ Սագիմբաևին։
Հիշեցնենք, որ հունվարի 2-ին Ղազախստանի մի շարք բնակավայրերում սկիզբ առած բողոքի ակցիաները մի քանի օրվա ընթացքում վերաճել էին անկարգությունների ու հարձակումների պետական մարմինների վրա։
Հազարավոր մարդիկ են տուժել, կան զոհեր: Նախագահ Կասիմ-Ժոմարտ Տոկաևը օգնության խնդրանքով դիմել էր Հավաքական անվտանգության պայմանագրի կազմակերպությանը։ Խաղաղապահներն արդեն սկսել են իրենց առաջադրանքները կատարել Ղազախստանում։
Ըստ իշխանությունների՝ հունվարի 7-ի դրությամբ բոլոր մարզերում ընդհանուր առմամբ վերականգնվել է սահմանադրական կարգը, սակայն Ալմաթիում իրավիճակը դեռևս կայուն չէ:
