Քաղաքականություն
29.12.2021 | 19:02Factor TV-ի «Ուշադրության կենտրոնում» հաղորդաշարի հերթական թողարկումը վարչապետ Նիկոլ Փաշինյանի տարեվերջյան ասուլիսի ժամանակ հնչած Արցախի կարգավիճակի վերաբերյալ հայտարարությունների, հիմնախնդրի կարգավորան շուրջ ստեղծված իրավիճակի մասին է։
Հիշեցնենք, որ Նիկոլ Փաշինյանն իր վերջին առցանց ասուլիսում հայտարարել էր, որ Արցախի կարգավիճակի հետ կապված բանակցային գործընթացում աղետ է եղել։ Նա ներկայացրել էր, որ 2011 թվականից ի վեր բանակցություներում չի ներառվել նախադասություն այն մասին, որ ԼՂ-ն ստանում է միջանկյալ կարգավիճակ, որը հայկական կողմից լայնորեն քարոզվում ու գովազդվում է։
«Հայ կառուցողական կուսակցության» նախագահ, քաղաքագետ Անդրիաս Ղուկասյանի խոսքով՝ Նիկոլ Փաշինյանը փորձում է արդարանալ, թե ինքն ինչու է 2019 թվականին մերժել «Լավրովի պլանը» և դրանով նպաստել, որ ուժ գործադրելու համար պայմաններ ստեղծվեն։
«Սուբյեկտիվ առումով ինքը, բնականաբար, պետք է յուրաքանչյուր ելույթի հնարավորությունն օգտագործի՝ իրեն արդարացնելու համար»,- հավելեց քաղաքագետը։
Ազգային անվտանգության և ռազմական հարցերով փորձագետ, քաղաքագիտության դոկտոր Հրաչյա Արզումանյանի խոսքով էլ՝ Արցախի կարգավիճակի խնդիրը հիմա Երևանում է լուծվելու։
«Հայաստանի իշխանությունները, դիվանագիտությունը պետք է ձևավորեն իրենց մոտեցումները խնդրի վերաբերյալ։ Մինչև հայկական կողմը չընդունի, որ պետք է ձևավորի դիվանագիտություն, քաղաքականություն, այլ ոչ թե մանիպուլյացիաներ, ինչը մենք այսօր ենք տեսնում, մենք հնարավորություն չենք ունենալու խոսել Արցախյան խնդրի, Արցախի հայության, Արցախի պետականության ձևավորման մասին»,- ասաց նա։
Ըստ Արզումանյանի՝ հիմա հիմնական խնդիրն Արցախը չէ, որը կփորձի իր ինքնապաշտպանական խնդիրները լուծել, խնդիրը Հայաստանի ղեկավարությունն է։
«Եթե դու չունես դիրքորոշում, եթե դու հետ ես շպրտում 25 տարվա ճանապարհը և դրա փոխարեն ոչ մի բան չես առաջարկում կամ առաջարկում ես իրականությունից, դիվանագիտությունից, միջազգային հասարակությունից կտրված մոտեցումներ, քեզ հետ չեն խոսում, քեզ դուրս են հանում այդ սեղանից»,- նշեց նա։
Մանրամասները՝ տեսանյութում։
Հռիփսիմե Հովհաննիսյան
