Իշխանությունն ինքն է ավտորիտար կառավարման փաստեր տրամադրում. Արթուր Սաքունց. ՏԵՍԱՆՅՈՒԹ

Oրերս Freedom House իրավապաշտպան կազմակերպությունը հրապարակեց զեկույց՝ անցումային շրջանում գտնվող երկրների վերաբերյալ: Ըստ այդ զեկույցի՝ ժողովրդավարության ոլորտում Հայաստանը նախորդ տարվա համեմատ զիջել է դիրքերը և կանգնած է ավտորիտար պետություն դառնալու վտանգի առաջ:

Նախորդ տարիների նման Հայաստանն այս անգամ էլ որակվել է կիսակոնսոլիդացված ավտորիտար պետություն:

Դավիթ Հարությունյանը թեև ընդունում է, որ հեղինակավոր իրավապաշտպան կազմակերպության զեկույցները խորհելու առիթներ տալիս են, այդուհանդերձ, կարծում է՝ կազմակերպության ոչ բոլոր զեկույցներն են բացարձակ օբյեկտիվ: Արդարադատության նախարարը հայտարարում է՝ առաջին անգամն է, որ իրավապաշտպան կազմակերպությունը հրապարակում է զեկույց, որն արմատապես տարբերվում է այն ընդունված մեթոդաբանությունից, որը որդեգրել է:

Իրավապաշտպան կազմակերպությունը զեկույցում անդրադառնում է Սերժ Սարգսյանի իշխանության երկարաձգմանը՝ նշելով, որ Սարգսյանի պաշտոնավարման տարիներին Հայաստանում ժողովրդավարության ցուցիչը նվազել է:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, սակայն, նշում է՝ եթե արդարադատության նախարարը խոսում է մեթոդաբանությունից շեղվելու մասին, ապա պետք է պարզաբանի, թե ինչ հիմնավորմամբ է դա անում:

Դավիթ Հարությունյանը նաև պնդում է, որ զեկույցը նախորդներից տարբերվում է նաև նրանով, որ քաղաքական գործիչներին պիտակավորելու փորձեր են արվել, իսկ նախկինում եղել են միայն քննադատություններ:

Ի դեպ, իրավապաշտպանը, որպես օրինակ, նշում է երեկ տեղի ունեցած հանրահավաքի ընթացքում իրավապահների ներգրավվածությունը, երբ ցուցարարները փորձում էին շրջափակել ՀՀԿ գրասենյակը, սակայն ոստիկանները թույլ չտվեցին մոտենալ շենքին:

Շողիկ Գալստյան