16.01.2025 | 09:30
Վայոց ձորի, Արագածոտնի մարզերում և Անիի տարածաշրջանում ձյուն է տեղում
ՄԱԿ-ի գլխավոր քարտուղարը կոչ է արել պատրաստվել COVID-19-ից հետո հաջորդ համաճարակին
Քաղաքականություն
27.12.2021 | 13:50
COVID-19-ի համաճարակը մարդկության համար վերջինը չէ, անհրաժեշտ է պատրաստվել հաջորդին։ Այս մասին հայտարարել է ՄԱԿ-ի գլխավոր քարտուղար Անտոնիո Գուտերեշը Թվիթերում գրառմամբ։
Դեկտեմբերի 27-ին աշխարհում նշվում է հակահամաճարակային պատրաստվածության միջազգային օրը։ ՄԱԿ-ի Գլխավոր վեհաժողովն այն հռչակել է 2020 թվականի նոյեմբերին։
«COVID-19-ը չի լինի վերջին համաճարակը, որին կբախվի մարդկությունը: Մինչ մենք պայքարում ենք այս առողջապահական ճգնաժամի դեմ, մենք պետք է պատրաստվենք հաջորդին: Հակահամաճարակային պատրաստվածության միջազգային օրը եկեք ուշադրություն դարձնենք այս խնդրին և առանձնացնենք դրա համար պահանջվող ներդրումները»,- գրել է Գուտերեշը։
Համաճարակը լայնածավալ էպիդեմիա է, որը կարող է ազդել մի ամբողջ երկրի, մի քանի հարևան երկրների և մայրցամաքների վրա: Դրան բնորոշ են վարակման դեպքերի շատ մեծ թիվը (մինչև մի քանի միլիոն մարդ), իսկ տևողությունը կարող է մեկ տարուց մինչև տասնյակ տարիներ լինել։
Առավել կործանարար հետևանքներով որոշ համաճարակներ ստացել են հատուկ անվանումներ. օրինակ՝ «Հուստինիանոսի ժանտախտ» (6-րդ դար, Հուստինիանոս I կայսրի օրոք), 14-րդ դարում ժանտախտի համաճարակը՝ «սև մահ», 20-րդ դարում գրիպի համաճարակը՝ «իսպանկա»։
Տաթև Ֆռանգյան
