21.04.2026 | 23:25
Եթե յուրաքանչյուրին ձայնագրես, ամեն մեկը մի բան կասի. Կարապետյանը՝ «շուն ու շանգյալ» բնորոշման մասին. ՏԵՍԱՆՅՈՒԹ
Էրդողանը հայտարարել է, որ արտահերթ ընտրություններ չեն անցկացվելու
Քաղաքականություն
22.12.2021 | 16:58
Թուրքիայի նախագահ Ռեջեփ Թայիփ Էրդողանը հայտարարել է, որ ճգնաժամային գործընթացը, որը տարածաշրջանում և գլոբալ մակարդակով շարունակվում է 10 տարի, առանձնահատուկ ծավալներ է ձեռք բերել կորոնավիրոսի համավարակի ֆոնին։ Այս մասին Էրդողանը հայտարարել է իշխող «Արդարություն և զարգացում» կուսակցության խորհրդարանական խմբակցության նիստում, գրում է «Անադոլու» գործակալությունը։
Նա կրկին խոսել է տնտեսությանը վնասելու միջոցով Թուրքիայում իրավիճակն ապակայունացնելու փորձերի մասին։
«Թուրքիայի Հանրապետության ամբողջ պատմության ընթացքում մեր երկրի զարգացումը փորձել են դանդաղեցնել ՝ստիպելով թուրք ժողովրդին կենտրոնանալ ներին խնդիրների վրա։ Սակայն մենք լի ենք վճռականությամբ՝ երկիրը դուրս բերելու աշխարհի առաջատար տնտեսությունների շարք»,- ասել է Էրդողանը, որն արդեն մեկ տասնամյակ է՝ նույն խոստումն է տալիս։
Նա նշել է, որ «տնտեսական առաջընթացի ճանապարհին խոչընդոտներից մեկն էլ բարձր գնաճն ու բարձր տոկոսադրույքներն են»։ Էրդողանը նաև հավելել է, որ կառավարությունը քաջ գիտակցում է իր գործողությունների հետևանքները տնտեսական ոլորտում։
Անդրադառնալով արտահերթ ընտրություններ անցկացնելու՝ ընդդիմության պահանջին՝ Էրդողանը նշել է, որ դա չի լինելու։
«Ընտրությունները Թուրքիայում կանցկացվեն այնպես, ինչպես ծրագրված է 2023 թվականի հունիսին և վերջ։ Թուրքիան իրավական պետություն է և բոլոր գործընթացներն ընթանում են օրենքի շրջանակում։ Ոչ ոք չի կարող հետ գցել Թուրքիայի զարգացումը։ Անձնական նկրտումները չեն կարող վեր դասվել Թուրքիայի 84 մլն բնակիչների շահերից։ Մենք հասնելու ենք այն նպատակներին, որոնք դրված են մինչև 2023 թվականն ընկած ժամանակահատվածի համար»,- ասել է Թուրքիայի նախագահը։
Էմմա Չոբանյան
