Քաղաքականություն
12.04.2018 | 11:04
Ազգային ժողովն այսօր կողմ քվեարկեց «ՀՀ Ազգային ժողովի աշխատակարգը հաստատելու մասին» ՀՀ Ազգային ժողովի 2016 թվականի ԱԺՈ-267 ն որոշման մեջ փոփոխություններ կատարելու մասին» ՀՀ օրենքի նախագծին:
Նախագծով խորհրդարանական լսումներ հրավիրելու իրավունք կունենա ՀՀ ԱԺ նախագահը, առաջարկելու՝ ՀՀ ԱԺ խմբակցությունը:
Լսումների հրավիրման մասին որոշումը տեղադրվում է Ազգային ժողովի պաշտոնական կայքում, իսկ լսումների վերաբերյալ տեղեկատվությունը դրանց անցկացման օրվանից առնվազն երեք աշխատանքային օր առաջ տրամադրվում է զանգվածային լրատվության միջոցներին:
Վարման կարգով ելույթ ունեցավ նախագծի հեղինակ, հիմնական զեկուցող ԱԺ ՀՀԿ խմբակցության պատգամավոր Կարինե Աճեմյանը՝ հորդորելով պատգամավորներին կողմ քվեարկել նախագծին: ԱԺ «Ելք» խմբակցության պատգամավոր Էդմոն Մարուքյանն էլ նկատեց, որ նախագիծը վերաբերում է լսումներին, և որ լսումների արձանագրությունը չի տեղադրվելու ԱԺ կայքում:
«Եթե լսումների արձանագրությունը չի տեղադրվելու կայքում «Ելք»-ը դեմ է քվեարկելու»,- ասաց նա:
«Ծառուկյան» խմբակցության պատգամավոր Նաիրա Զոհրաբյանը ևս հայտարարեց՝ «Ծառուկյան» խմբակցությունը նախագիծը հետընթաց է համարում: «Չենք պատրաստվում առանձին նախաձեռնությամբ հանդես գալ, լրագրողների հետ կապված փոփոխությունն էլ համարում ենք հետընթաց և ուրեմն «Ծառուկյան» դաշինքը դեմ է քվեարկելու նախագծին»,- նշեց պատգամավորը:
Նախագիծն ընդունվեց ձայների 61 կողմ և 31 դեմ հարաբերակցությամբ:
