23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
«Revive» աքսելերացիոն ծրագրի չորս հաղթող ստարտափ դրամաշնորհ է ստացել
Հասարակություն
21.12.2021 | 16:32
Երևանում դեկտեմբերի 20-ին կայացավ Հայաստանի գիտության և տեխնոլոգիաների հիմնադրամի (FAST) կողմից իրականացված ՄԱԿ-ի Զարգացման ծրագրի (ՄԱԶԾ) հայաստանյան գրասենյակի օժանդակ տեխնոլոգիաների զարգացման «Revive» աքսելերացիոն ծրագրի արդյունքների ամփոփման պաշտոնական արարողությունը։ Տեխնոլոգիական աքսելերատորի նպատակը տեղի և արտասահմանյան ստարտափների կարողությունների զարգացումն ու նրանց ընթացիկ գործունեության ընդլայնումն էր՝ ուղղված հաշմանդամություն ունեցող անձանց կյանքի որակի բարձրացմանը նպաստող օժանդակ տեխնոլոգիաների մշակմանը. տեղեկացնում են ՀՀ աշխատանքի և սոցիալական հարցերի նախարարությունից։
Վետերանների աջակցման «Revive» ծրագիրը ՄԱԶԾ ImpactAim Venture Accelerator-ի նախագծերից է, որն իրականացվել է Հայաստանի գիտության և տեխնոլոգիաների հիմնադրամի (FAST) կողմից՝ ՀՀ աշխատանքի և սոցիալական հարցերի նախարարության հետ համագործակցությամբ։
«Revive»-ին մասնակցության հայտ էր ներկայացրել յոթ երկրի 18 ստարտափ, այդ թվում՝ հայկական ընկերություններ, որոնցից 12-ն են մասնակցել հինգշաբաթյա աքսելերացիոն ծրագրին: Մասնակիցները FAST-ի աջակցությամբ լրամշակել են իրենց լուծումները, ծանոթացել տեղական և միջազգային շուկա մուտք գործելու, առողջապահական անհրաժեշտ հավաստագրեր ստանալու կարգին, ինչպես նաև ստացել խորհրդատվություն բիզնեսի զարգացման այլ ուղղություններով:
Փակման արարողության ժամանակ հայտարարվել են հաղթող ճանաչված չորս ընկերությունները, որոնք Հայաստանից, Իրանից ու ԱՄՆ-ից են: Իմպլանտներ արտադրող հայկական AIP Tech ստարտափը ստացել է 7 հազար ԱՄՆ դոլար դրամաշնորհ, մյուս երեքը՝ ամերիկյան Key2Enable-ը, իրանական Sheral-ը և հայկական Oqni-ն արժանացել են 2 հազարական ԱՄՆ դոլար պարգևի:
ՀՀ աշխատանքի և սոցիալական հարցերի նախարար Նարեկ Մկրտչյանն ընդգծեց, որ ծրագրի նպատակն է աջակցել բոլոր այն ստարտափերին, որոնք նպատակ ունեն նորագույն տեխնոլոգիաների միջոցով հեշտացնել և բարեկեցիկ դարձնել հաշմանդամություն ունեցող անձանց կյանքը ․«Հաշմանդամություն ունեցող անձանց ուղղված ծառայությունների որակի բարձրացումն, ինչպես նաև ներառական զարգացման ապահովումն Աշխատանքի և սոցիալական հարցերի նախարարության առաջնահերթություններից է: Այս նպատակով՝ վերջին տարիների ընթացքում նախաձեռնել ենք մի շարք բարեփոխումներ՝ մշակելու, իրականացնելու և ամրապնդելու այն քաղաքականություններն ու ծրագրերը, որոնք ուղղված են աջակցող միջոցների հասանելիությանը և հաշմանդամություն ունեցող անձանց համար ավելի մատչելի պայմանների ստեղծմանը»,-նշեց նախարարը։
Հայաստանում ՄԱԶԾ մշտական ներկայացուցիչ Նաթիա Նացվլիշվիլին նշեց, որաշխարհում շուրջ մեկ միլիարդ մարդ ունի օժանդակ տեխնոլոգիաների կարիք։ Ըստ որոշ գնահատականների՝ 2030-ին այդ թիվը կարող է հասնել երկու միլիարդի: «Այս ամենի մեջ լավ լուրն այն է, որ տեխնոլոգիաների զարգացումը թույլ է տալիս հաշմանդամություն ունեցող անձանց ապահովել օժանդակ տեխնոլոգիաներով: Եվ մեր հանձնառությունն է աջակցել տեխնոլոգիական լուծումներ առաջարկող ընկերություններին, որպեսզի նրանց օգնությամբ արժանապատիվ կյանք վարելու հնարավորություն ստեղծենք հատուկ կարիքներով անձանց համար»,- ընդգծեց Հայաստանում ՄԱԶԾ մշտական ներկայացուցիչը:
Նաթիա Նացվլիշվիլին իր երախտիքի խոսքը հայտնեց գործընկերներին ու մասնակից ստարտափներին՝ հույս հայտնելով, որ այն կարևոր ու շահավետ փորձառություն էր նրանց համար:
Հայաստանի գիտության և տեխնոլոգիաների հիմնադրամի (FAST) ռազմավարական ծրագրերի գծով փոխնախագահ Սյուզաննա Շամախյանը նկատեց, որ ծրագիրը հաջողել է երեք կողմերի արդյունավետ աշխատանքի շնորհիվ:
«Մենք մեծապես կարևորում ենք կառավարության և միջազգային գործընկերների հետ համագործակցությունը Հայաստանում գիտության ու տեխնոլոգիաների համակարգային զարգացումը խթանելու նպատակով: Սա ՄԱԶԾ-ի հետ մեր երկրորդ նախագիծն է. առաջինը՝ Հայաստանի ազգային ագրարային համալսարանում հիմնադրված AgriTech աքսելերատորն է, որն արդեն գրանցել է մեծ հաջողություններ», – ասաց FAST-ի ռազմավարական ծրագրերի գծով փոխնախագահը:
Սյուզաննա Շամախյանի խոսքով՝Հայաստանը, լինելով տարբեր շուկաների խաչմերուկում, ունի մեծ ներուժ դառնալու նորարարական հանգույց ոչ միայն տեղական, նաև արտասահմանյան աճի փուլում գտնվող ընկերությունների համար: Եվ հատկանշական է, որ ծրագիրը նախատեսված էր նաև արտասահմանյան ստարտափների համար: «Ծրագրի կարևոր բաղադրիչներից է այն, որ տեղական ու արտասահմանյան ընկերությունները մշակում են լուծումներ Հայաստանում ներդնելու և զարգացնելու համար, և ստանում հնարավորություն հետագայում միջազգային այլ շուկաներ դուրս գալու, այդ թվում՝ Եվրասիական միության, Եվրոպական միության և Մերձավոր Արևելքի երկրներ»,-հավալեց Սյուզաննա Շամախյանը:
Միջոցառման ընթացքում հաղթող ճանաչված ստարտափները տեսակապի միջոցով ներկայացրին իրենց տեխնոլոգիական լուծումներն ու դրանք Հայաստանում կիրառելու հեռանկարը:
«Revive»-ը ՄԱԶԾ-ի կողմից իրականացվող վետերանների աջակցմանն ուղղված ավելի մեծ աշխատանքի մաս է՝ UNDP Tech2Life «Օժանդակ տեխնոլոգիաները՝ ինքնաբավ կյանքի համար» ծրագրի շրջանակներում։
