12.09.2026 | 15:44
Պուտինը սպառնում է Եվրոպային պատերազմով՝ Ուկրաինա զորքեր մտցնելու դեպքում․ DW
Ադրբեջանը և Թուրքիան նախատեսում են բնական գազի ու մի շարք այլ ոլորտներում համագործակցության վերաբերյալ փաստաթղթեր ստորագրել
Քաղաքականություն
20.12.2021 | 18:09
Բաքուն և Անկարան նախատեսում են համագործակցության մի շարք փաստաթղթեր ստորագրել գազի ու հանքարդյունաբերության ոլորտում։ Փաստաթղթերի ստորագրումը նախատեսվում է թուրք-ադրբեջանական առաջին էներգետիկ ֆորումի ընթացքում, որը տեղի է ունենալու Բաքվում դեկտեմբերի 21-22-ը։ Այս մասին հայտնում է «Ինտերֆաքսի» ադրբեջանական ծառայությունը։
Նշվում է, որ թուրք-ադրբեջանական առաջին էներգետիկ ֆորումն ուղղված է Թուրքիայի և Ադրբեջանի միջև էներգետիկ համագործակցության հետագա զարգացմանը։ Համաժողովը դռներ է բացելու նաև նոր ներդրումների համար։ Այդ համատեքստում աշխատանքային խմբեր են ձևավորվել համաձայնեցված ենթաոլորտներում։
Լրատվամիջոցների տվյալներով՝ աշխատանքային խմբերի կողմից մատնանշվել են համագործակցության կոնկրետ քայլեր՝ նավթաքիմիական, ածխաջրածնային, վերականգնվող էներգիայի և էներգաարդյունավետություն, էլեկտրաէներգիայի շուկայի, էլեկտրաէներգիայի բաշխման և փոխանցման վերաբերյալ։
Նշվում է, որ աշխատանքային խմբերը ներկայացնելու են իրենց հաշվետվությունները համագործակցության վերաբերյալ։ Դեկտեմբերի 22-ին էլ նիստի արդյունքներով, որը տեղի է ունենալու Ադրբեջանի էներգետիկայի նախարար Փարվիզ Շահբազովի ու Թուրքիայի էներգետիկայի և բնական պաշարների նախարար Ֆաթիհ Դյոնմեզի համանախագահությամբ, ստորագրվելու է համագործակցության հուշագիր։ Նախատեսվում է նաև համագործակցության զարգացման մի շարք փաստաթղթերի ստորագրում բնական գազի ու օգտակար հանածոների շահագործման ոլորտներում։
Էմմա Չոբանյան
