09.06.2026 | 14:50
Մանդատ վերցնելու հարցը կորոշենք ՍԴ դիմելուց հետո՝ խորհրդակցելով շեմը անցած ուժերի հետ․ Սաղաթելյան․ ՏԵՍԱՆՅՈՒԹ
Ազատության ջահն՝ ԱԺ-ում․ ընդդիմադիր պատգամավորներն ակցիա իրականացրեցին․ ՏԵՍԱՆՅՈՒԹ
11.04.2018 | 12:20
ԱԺ «Ելք» խմբակցության պատգամավորներ Արարատ Միրզոյանն ու Լենա Նազարյանն այսօր խորհրդարանի դահլիճում գունավոր ճայթրուկներ վառեցին՝ կոչ անելով քաղաքացիների ապրիլի 13-ին ժամը 18:30-ին լինել Ազատության հրապարակում և միասին վառել «ազատության ջահը»: Մինչ ճայթրուկներ վառելը| Արարատ Միրզոյանը ամբիոնից դիմեց Հայաստանի քաղաքացիներին. «ՀՀ ազատ քաղաքացիներ, եկել է պահը, երբ մենք կարող ենք կանխել Սերժ Սարգսյանի երրորդ ժամկետի իշխանավարումը, վերջ տալ ՀՀԿ իշխանությանը եւ կերտել մեր երազանքների Հայաստանը, դրա համար անհրաժեշտ է ապրիլի 13-ին՝ ժամը 18:30-ին, գալ Ազատության հրապարակ, որտեղ մենք միասին կվառենք Ազատության ջահը»:
Ակցիայից հետո ԱԺ փոխնախագահ Էդուարդ Շարմազանովը հայտարարեց՝ շոուն չստացվեց:
ԱԺ «Ելք» խմբակցության քարտուղար Գևորգ Գորգիսյանը նիստը նախագահողին խնդրեց ընդմիջում հայտարարել, Շարմազանովը, սակայն, մերժեց՝ ասելով, որ ընդմիջումները քվեարկությունից առաջ և հետո են: «Թող հանրությունը որոշի՝ ով ինչով է զբաղված պառլամենտում»,- հավելեց ԱԺ փոխնախագահը:
Գորգիսյանն, այդուհանդերձ, չլքեց նիստերի դահլիճը, փոխարենը թաշկինակով փակեց քիթը: Ելույթով հանդես եկավ նաև ԱԺ նախագահ Արա Բաբլոյանը՝ նշելով, որ իրականացված ակցիան անթույլատրելի է: Վարման կարգով խոսեց նաև «Ելք»-ից Մանե Թանդիլյանը՝ հորդորելով իր գործընկերների քայլին վերաբերել որպես ըմբոստության քայլ:
«Հեգնանքն ու ծաղրանքը տեղին չեն, բայց կարծում եմ՝ ինչպես պարոն Բաբլոյանն ասաց, առողջությանը կարող էր վնասել, թեև վստահ չեմ»,- հավելեց Մանե Թանդիլյանը: Ի դեպ՝ Արարատ Միրզոյանը լրագրողների հետ զրույցում շատ կարճ մեկնաբանեց իրենց նախաձեռնած ակցիան՝ ասելով, որ իրենց վառած ճայթրուկները բացարձակ անվտանգ էին:
