10.06.2026 | 21:26
Չենք բացառում հնարավոր սադրանքի դրսևորումները. ՆԳՆ-ն «Մայր Հայաստան»-ի դեպքով հաղորդում է ուղարկում ՔԿ
Ուկրաինան դիմել է ԱՄՆ-ին՝ խնդրելով փոխանցել ամերիկյան զենքի մի մասը, որը նախատեսված էր Աֆղանստանի համար․ Foreign policy
Քաղաքականություն
07.12.2021 | 15:20
Ուկրաինայի պաշտպանության նախարար Ալեքսեյ Ռեզնիկովը նոյեմբերին դիմել է Պենտագոնի ղեկավարի Լլոյդ Օսթինին՝ Ռուսաստանի հնարավոր ներխուժման դեպքում Կիևին զենքի մատակարարումները ընդլայնելու հարցով։ Այս մասին գրել է Foreign Policy պարբերականը։
Լրատվամիջոցը նշում է, որ ցուցակում ընդգրկվել են նաև սպառազինությունների համակարգեր, որոնք նախատեսված էր մատակարարել Աֆղանստանին։
«Զենքի մանրամասն ցուցակը, որն առաջին անգամ Ռեզնիկովը ներկայացրել է Օսթինին նոյեմբերի կեսին, և որում ավելի վաղ չէր բարձրաձայնվում, ներառել է օդային, ծովային և էլեկտրոնային պայքարի միջոցներ»,- հայտնում է պարբերականը՝ Ուկրաինայի ՊՆ-ի իր անանուն աղբյուրին վկայակոչելով։
Այդ տվյալների համաձայն՝ Կիևը, մասնավորապես, ցանկանում է ստանալ ամերիկյան ռազմական տեխնիկայի մասը, որը նախատեսված է եղել Աֆղանստանի համար՝ այնտեղ «Թալիբան»-ի իշխանության գալուց առաջ։ Աղբյուրը նշել է, որ Ուկրաինան, մասնավորապես, հետաքրքրված է ԱՄՆ-ի Մի-17 ուղղաթիռներով և զինամթերքով, որոնք նախապես նախատեսվում էր ուղարկել աֆղանական բանակին։
Մինչ այդ, ԱՄՆ նախագահ Ջո Բայդենի վարչակազմը դիտարկում է Ուկրաինայի ԶՈՒ-ի ուժեղացման մի շարք քայլեր՝ հաշվի առնելով ռուսական հնարավոր ներխուժումը, որը ներառում է նաև Ռեզնիկովի ցուցակից բացակայող միջոցներ։
Պարբերականը նշում է նաև, որ Բայդենի ազգային անվտանգության հարցերով խորհրդական Ջեք Սալիվանն ու նրա թիմը ձգտում են ուշադրությունը կենտրոնացնել Չինաստանից աճող սպառնալիքի ուղղությամբ, ինչպես նաև չեն ցանկանում գրգռել Մոսկվային։
Սպիտակ տան խոսնակ Ջեն Փսակին դեկտեմբերի 3-ի ճեպազրույցում մեկնաբանելով տեղեկություններն այն մասին, որ վարչակազմը քայլեր է մշակում Կիևին համակողմանիորեն աջակցելու համար, ասել է, որ Միացյալ Նահանգները ներկայում ուսումնասիրում է Ուկրաինային հետագա ռազմական օգնության հնարավորությունը:
Հավելենք նաև, որ Ջո Բայդենի քաղաքականությունն Ուկրաինայի նկատմամբ դարձել է ամերիկյան Կոնգրեսում քաղաքական թեժ մարտերի թեմա։ Պարբերականի տվյալներով՝ Ներկայացուցիչների պալատի և Սենատի զինված ուժերի հարցերով հանձնաժողովների անդամ բարձրաստիճան հանրապետականները նամակ են ուղարկել Բայդենին, որում մտահոգություն են հայտնել Ուկրաինայի շուրջ ստեղծված իրավիճակի կապակցությամբ։
Էմմա Չոբանյան
