Կոռուպցիան սպառնում է համաշխարհային ժողովրդավարությանը․ Սպիտակ տունը հրապարակել է կոռուպցիայի դեմ ուղղված ԱՄՆ ռազմավարությունը

Սպիտակ տունը հրապարակել է կոռուպցիայի դեմ պայքարի ԱՄՆ ռազմավարոթյունը։ Սպիտակ տան պաշտոնական կայքէջում տեղադրված հաղորդագրության մեջ նշվում է, որ կոռուպցիան քաղցկեղ է հասարակությունների մարմնում՝ հիվանդություն, որը խժռում է հանրային վստահությունը և կառավարությունների՝ իրենց քաղաքացիներին տված խոստումները կատարելու կարողությունը:

«Կոռուպցիայի վնասակար հետևանքներն ազդում են հասարակության գրեթե բոլոր շերտերի վրա: Այն խորացնում է սոցիալական, քաղաքական և տնտեսական անհավասարությունն ու բևեռացումը, խոչընդոտում է պետությունների՝ հանրային առողջապահական ճգնաժամերին արձագանքելու կամ որակյալ կրթություն տրամադրելու կարողությանը, վատթարացնում է բիզնես միջավայրը և տնտեսական հնարավորությունները, հրահրում է հակամարտություններ և խաթարում է հավատը կառավարության հանդեպ:

Նրանք, ովքեր չարաշահում են պաշտոնական դիրքը անձնական շահի համար, գողանում են ոչ միայն նյութական հարստությունը, այլև մարդկային արժանապատվությունն ու բարօրությունը:

Ճանաչելով կոռուպցիայի՝ ժողովրդավարությունը քայքայելու կարողությունը՝ 2021 թվականի հունիսի 3-ին ԱՄՆ նախագահ Բայդենը կոռուպցիայի դեմ պայքարը հաստատել է որպես ԱՄՆ ազգային անվտանգության հիմնական շահ:

Համապատասխանաբար, նա հանձնարարել է իր ազգային անվտանգության թիմին՝ ղեկավարել համապարփակ ռազմավարության ստեղծումը, որը, իրականացման դեպքում, կբարելավի ԱՄՆ կառավարության կարողությունը՝ կանխելու կոռուպցիան, ավելի արդյունավետ պայքարելու ապօրինի ֆինանսավորման դեմ, կոռումպացված դերակատարներին ավելի արդյունավետ պատասխանատվության ենթարկելու համար»,- ասվում է Սպիտակ տան կողմից հրապարակված հայտարարության մեջ, որտեղ մեջբերվում է ԱՄՆ նախագահ Ջո Բայդենի՝ 2021 թվականի հունիսի 3-ին արված հայտարարությունը։

«Կոռուպցիան սպառնում է Միացյալ Նահանգների ազգային անվտանգությանը, տնտեսական արդարությանը, աղքատության դեմ պայքարին ու զարգացմանն ուղղված համաշխարհային ջանքերին և հենց ժողովրդավարությանը: Սակայն արդյունավետորեն կանխելով և հակազդելով կոռուպցիային, ինչպես նաև ցուցադրելով թափանցիկ և հաշվետու կառավարման առավելությունները՝ մենք կարող ենք կարևոր առավելություն ապահովել Միացյալ Նահանգների և այլ ժողովրդավարական երկրների համար»,- հայտարարել էր ԱՄՆ նախագահ Ջո Բայդենը:

Տաթև Ֆռանգյան