Լավրովը հայտարարել է, որ ՌԴ-ի և Հնդկաստանի միջև «2+2» ձևաչափը դառնալու է երկխոսության արդյունավետ հարթակ

ՌԴ ԱԳ նախարար Սերգեյ Լավրովը համոզված է, որ Ռուսաստանի և Հնդկաստանի ԱԳՆ ու ՊՆ ղեկավարների միջև «2+2» խորհրդատվական ձևաչափը դառնալու է արդյունավետ երկխոսության հարթակ տարածաշրջանային և միջազգային օրակարգի հարցերի լայն շրջանակի քննարկման համար, գրում է ՏԱՍՍ գործակալությունը։

«Ինձ անկեղծ հաճույք է պատճառում պատմության մեջ առաջին անգամ արտաքին քաղաքական և պաշտպանական գերատեսչությունների ղեկավարների «2+2» ձևաչափով հանդիպմանը մասնակցելը։ Այս նախաձեռնությունը հավանության է արժանացել նախագահ Պուտինի ու վարչապետ Մոդիի կողմից։ Վստահ եմ, որ նոր մեխանիզմը կդառնա արդյունավետ երկխոսության հարթակ՝ տարածաշրջանային ու միջազգային թեմաների լայն շրջանակի քննարկման համար, կնպաստի ավանդական փոխըմբռնման խորացմանը, մեր երկրների միջև հատուկ արտոնյալ ռազմավարական գործընկերության ամրապնդմանը»,- ասել է Լավրովը «2+2» ձևաչափով բանակցությունների ժամանակ։

ՌԴ ԱԳ նախարարը նաև ընդգծել է, որ Ռուսաստանն ու Հնդկաստանն ունեն ավելի արդար, ավելի ժողովրդավար, բազմակենտրոն աշխարհակարգի մոդելի նման տեսլական, առաջ են տանում նույնական կամ մոտ դիրքորոշումներ աշխարհի կարևորագույն խնդիրների ու անվտանգության հետ կապված։ Երկու երկրներն էլ հանդես են գալիս «միջազգային իրավունքի, միջպետական շփումների հավաքական սկզբունքների պահպանման, ինքնիշխան պետություններին ներքին գործերին չխառնվելու օգտին և ունեն հարգանք աշխարհի մշակութաքաղաքակրթական բազմազանության նկատմամբ»։

«Այս ամենը ստեղծում է լավ, ամուր հիմք արդյունավետ աշխատանքի համար՝ այսօր գործարկվող ռուս-հնդկական երկխոսության նոր մեխանիզմի շրջանակներում»,-ասել է Լավրովը։

Հավելենք, որ այսօր երեկոյան աշխատանքային այցով Դելի է ժամանելու ՌԴ նախագահ Վլադիմիր Պուտինը։ Նա բանակցություններ է անցկացնելու Հնդկաստանի վարչապետ Նարենդրա Մոդիի հետ։

Էմմա Չոբանյան