08.06.2026 | 22:58
Հայտնի է նոր Ազգային ժողովի առաջին նիստի օրը
Վախից դրդված՝ մտել են ՔՊ-ի ցուցակ․ ի՞նչ խախտումներ են արձանագրել Արթիկի թեկնածուները
Տնտեսություն
05.12.2021 | 20:31
Շիրակի մարզպետարանի գլխավոր քարտուղար Արսեն Աբրահամյանը, որն Արթիկ խոշորացվող համայնքի ՏԻՄ ընտրություններին մասնակցում է «Հանուն Հանրապետության» ժողովրդավարության պաշտպանների դաշինք կուսակցությամբ, ասաց, որ իր մրցակից ուժերից «Միասնական Արթիկ» դաշինքի ավագանու անդամը ուղորդումներ է կատարել ընտրատեղամասերից մեկում։ Ահազանգը ստանալուն պես՝ իրենք գնացել են ընտրատեղամաս, տեսել թեկնածուին, զրուցել։
Ըստ թեկնածուի՝ քարոզարշավի ընթացքում նկատել են նաև վարչական ռեսուրսների կիրառում իշխող քաղաքական ուժի՝ ՔՊ-ի կողմից, վերջինիս ավագանու ցուցակում մեծավ մասամբ ընդգրկված են գյուղապետեր։
Ըստ Արսեն Աբրահամյանի՝ իրենք բոլոր փաստերն արձանագրել են։
Վարչական ռեսուրսների կիրառում են նկատել նաև Արթիկի քաղաքապետ Մխիթար Վարագյանի գլխավորած «Միասնական Արթիկ» դաշինքի կողմից։ Ըստ Արսեն Աբրահամյանի, քաղաքապետը դեռ իր լիազորությունները չդադարեցրած՝ քաղաքապետարանը վերածել էր նախընտրական շտաբի։
ՀՅԴ-ի համայնքապետի թեկնածու Հակոբ Մաթիլյանն էլ նշում է, որ քարոզարշավի ժամանակ եղել են վարչական ռեսուրսների կիրառման դեպքեր, նաև անհավասար պայմաններ են ստեղծել։ Մասնավորապես իրեն չեն թույլատրել ցուցապաստառներ փակցնել Պեմզաշեն գյուղում, որի ղեկավարը Անանիկ Ոսկանյանն է՝ Արթիկ խոշորացվող համայնքի ՏԻՄ ընտրություններում ՔՊ-ի ցուցակի առաջաին համարը։
ՀՅԴ թեկնածուն Արթիկի տարածաշրջանի գյուղապետերի՝ ՔՊ-ի ցուցակում ընդգրկվելը մեկնաբանում է որպես վախի դրսևորում, իրենց նկատմամբ հարուցված քրեական գործերից խուսափելու ձև։
«Վերջին երեք տարիների ընթացքում իշխանություններն անընդհատ նշում էին՝ գողացել եք, թալանել եք, գող եք, ավազակ եք, համայնքապետերն էլ երևի վախեցել են պատասխանատվությունից, փորձում են հարմար դասավորվել իշխանության թևի տակ։ Բոլորս գիտենք, որ այդ համայնքապետերի վրա քրեական գործեր կան սարքած, գործեր կան կարված, որոնք ցանկացած պահի թափահարում են, սկսում են վախեցնել»,- ասաց Հակոբ Մաթիլյանը։
Հիշեցնենք,որ Արթիկ խոշորացվող համայնքի ՏԻՄ ընտրությունին մասնակցում են 6 քաղաքական ուժեր՝ հինգ կուսակցություններ և մեկ դաշինք։ Այստեղ միավորում են 23 գյուղական համայնքներ և Արթիկ քաղաքը։
Արմիկ Մովսիսյան
