Քաղաքականություն
03.12.2021 | 22:28
Թուրքիայի տարեկան սպառողական գնաճի մակարդակը նոյեմբերին կազմել է 21,32 տոկոս, ինչը ամենաբարձրն է վերջին երեք տարվա ընթացքում։ Այս մասին են վկայում Թուրքիայի վիճակագրական ինստիտուտի (TurkStat) հրապարակած տվյալները, գրում է Bianet-ը։
Նշվում է, որ ամսական գնաճը կազմել է 3,51 տոկոս։
Ամենացածր տարեկան աճը կապի ոլորտում է․ այն կազմել է 5,77 տոկոս: Ալկոհոլային խմիչքի և ծխախոտի գնաճը կազմում է 7,91 տոկոս, հագուստինն ու կոշկեղենինը՝ 8,33 տոկոս, հանգիստինն ու մշակույթինը՝ 13,96 տոկոս։
Հյուրանոցները, սրճարաններն ու ռեստորանները (28,90 տոկոս), սննդամթերքը և ոչ ալկոհոլային խմիչքները (27,11 տոկոս), կահավորանքն ու կենցաղային տեխնիկան (25,14 տոկոս) եղել են տարեկան ամենաբարձր աճ գրանցած հիմնական խմբերը։
Նշվում է, որ ալկոհոլն ու ծխախոտը, կրթությունն ու հաղորդակցությունը հիմնական խմբերն են՝ ամենացածր ամսական աճով։ Ամենամսյա ամենաբարձր աճով հիմնական խմբերն են եղել տրանսպորտը (6,31 տոկոս), տարբեր ապրանքներն ու ծառայությունները (5,36 տոկոս), հյուրանոցները, սրճարաններն ու ռեստորանները (4,10 տոկոս):
Հավելենք, որ Թուրքիայում արժութային ճգնաժամի իրավիճակում սրվել են բնակիչների սոցիալական խնդիրները։ Թուրքական լիրան այս տարի արժեզրկվել է արդեն ավելի քան 40 տոկոսով։
Էմմա Չոբանյան
