08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
10 միլիոն 400 հազար դրամ՝ Գյումրու տոնածառի, տոնական զարդարանքի համար․ որոշում ավագանու նիստում
Տնտեսություն
03.12.2021 | 17:00
Գյումրու ավագանին՝ 22 կողմ, 7 ձեռնպահ ձայներով, որոշեց քաղաքի կենտրոնական Վարդանանց հրապարակում տոնածառ տեղադրելու ու պատմական փողոցները զարդարելու համար բյուջեից հատկացնել 10 միլիոն 400 հազար դրամ։
Եղան նաև առարկություններ, մասնավորապես, ավագանու «Զարթոնք» խմբակցության ղեկավար Վարդևան Հակոբյանի կողմից,որը առաջարկում էր տոնածառը տեղադրել, սակայն առանց փողոցների լուսավորության և հյուրասիրություն կազմակերպելու։
Զեկույցով հանդես եկավ Գյումրու քաղաքապետի ֆինանսական գծով խորհրդական Լենա Ջիլավյանը, որը պարզաբանեց՝ միջոցառումները լինելու են համեստ։
Գյումրու նորընտիր քաղաքապետ Վարդգես Սամսոնյանն էլ իր հերթին հավելեց, որ հյուրասիրությունը լինելու է զուսպ։
Լենա Ջիլավյանն իր խոսքում ասաց․ «Ես երեկ մտածում էի՝ այս նախագիծը կանցնի՞, թե՞ չի անցնի, քննարկե՞նք, թե՞ ոչ, հեռուստատեսությամբ տեսա, որ Երևանը տոնածառ դնում է քաղաքի հրապարակում, մեր էրեխեքն էլ երևանցի էրեխեքից պակասը չեն։
Եվ ուրախ եմ, որ մենք պիտի տոնածառ դնենք, մահը՝ մահ, էրեխեքի ուրախությունն էլ ուրախություն։ Դրա համար որոշել ենք ընդամենը 10 միլիոն 400 հազար դրամի սահմաններում քաղաքի որոշակի փողոցներ, մի քիչ տնական ասեմ՝ տեսանելի հատվածում դեկորային գեղեցկություն հաղորդել։
Տոնածառը տեղադրենք, մոնտաժ, ապամոնտաժ անենք, միջոցառում՝ լույսերի վառման արարողակարգ, փոքրիկ ֆուրշետ դահլիճում, մեր ավագանիներին, աշխատողներին շնորհավորանք, այդքան բան։ Նախահաշիվը 10 միլիոն 400 հազար դրամ։ Այդ գումարից 3 միլիոնն էլ նախատեսել ենք ամանորյա պարկերի համար»։
Գյումրու քաղաքապետարանի մշակույթի և երիտասարդության բաժնի պետ Լիլիթ Թովմասյանն էլ, մանրամասնելով տոնական միջոցառման ծրագիրը, նշեց, լույսը ապրելու, հավերժության գաղափարախոսությունն է։
«Մենք չենք կարող վերանալ այն իրականությունից, որի մեջ ենք, և այդ իրականության մեջ բոլորիս մեջ պակասում է լույսը», -ասաց Լիլիթ Թովմասյանը;
«Բալասանյան դաշինք»-ի ավագանու անդամ Սոնա Հարությունյանն էլ խնդրեց չպակասեցնել հատկացվող գումարի չափը, քանի որ Գյումրին զբոսաշրջային քաղաք է, ու պարտավոր են քաղաքի տեսքին, փողոցների լուսավորությանը հետևել։
Արմիկ Մովսիսյան
