Ռուսները չեն ընդունում ՀՀ տարածքի զավթման փաստը. Պուտինի և Ալիևի հետ եռակողմ հանդիպումը մեր շահերի դեմ կլինի. Էմիլ Օրդուխանյան․ ՏԵՍԱՆՅՈՒԹ

Factor TV-ի հարցազրույցը քաղաքագետ Էմիլ Օրդուխանյանի հետ

-Հայաստանը ինչպես դիվանագիտական, այնպես էլ ռազմական միջամտություն է ակնկալում Ռուսաստանից՝ Հայաստանի սուվերեն տարածքից ադրբեջանական զինուժի դուրսբերման նպատակով: Բայց, միաժամանակ, Պեսկովը հայտարարել է, որ իրավիճակը կկայունանա, եթե տեղի ունենա Փաշինյան-Պուտին–Ալիև հանդիպումը, և կողմերը ընդունեն նոյեմբերի 9-ի օրակարգը: Արդյո՞ք կկայանա այդ հանդիպումը և ի՞նչ օրակարգ է այն ենթադրում:

-Պեսկովի ասածը ենթադրել է տալիս, որ այդ օրակարգը պարտադրվող օրակարգ է, առնվազն Հայաստանի համար: Նախ հասկանանք՝ այս իրադարձություններն ինչից հետո տեղի ունեցան: Հիշենք, որ նոյեմբերի սկզբին ռուսական տարբեր աղբյուրներում շրջանառվեց տեղեկություն, որ նախապատրաստվում է եռակողմ հանդիպում, և հայկական կողմը պաշտոնական մակարդակով մի քանի անգամ նշեց, որ հանդիպման վերաբերյալ քննարկումներ չկան: Ենթադրելի փաստաթղթերի ստորագրման մասին տեղեկություն շրջանառվեց, հավանաբար, դա այնպիսի օրակարգ էր, որը չէր բխում Հայաստանի շահերից, դրան գումարվեց Շուշիի մերձակայքում խաղաղ բնակիչների վրա հարձակումը և նրանցից մեկի գնդակահարումը, և դա Հայաստանին վերջնականորեն հետ պահեց որևէ ձևաչափով հանդիպման մասնակցելուց:

Ստացվում է, որ եթե Պեսկովը այսպիսի խոսքով է հանդես գալիս, դրանով փորձում է սպառնալ Հայաստանին, որ եթե չգաք հանդիպման, ռազմական գործողությունները կարող են շարունակվել: Երեկ, երբ հաստատվեց կրակի դադարեցումը՝ ռուսական կողմի միջնորդությամբ, ամենևին խոսք չեղավ այն մասին, որ Ադրբեջանը խախտել է ՀՀ սուվերեն տարածքը:

Հարցազրույցն ամբողջությամբ՝ տեսանյութում:

Ռոբերտ Անանյան