Քաղաքականություն
16.11.2021 | 12:33
Արագածոտնի մարզի Բյուրական համայնքի մի խումբ բնակիչներ բողոքի ակցիա են իրականացնում՝ ընդդեմ համայնքապետի ժամանակավոր պաշտոնակատար Ռադիկ Գևորգյանի:
Համայնքի նախկին ղեկավար Զարզանդ Բաբայանի ղեկավարման ժամկետը լրացել է շաբաթներ առաջ՝ նոյեմբերի 1-ին, ինչից հետո համայնքի ղեկավարի ժամանակավոր պաշտոնակատար է նշանակվել Գևորգյանը: Ակցիայի մասնակիցները նշում են, որ համայնքի ղեկավարի նորանշանակ պաշտոնակատարին չեն ճանաչում:
«Թող մեր համայնքի մարդ լինի, որ մեր գյուղի ամեն ինչին տեղյակ լինի: Էստեղ գյուղապետ Բաբայանի հարցը չի, ինքը ոչ էլ ուզում ա գյուղապետ լինի: Բայց պետք ա թողնեն՝ մենք որոշենք, մեր գյուղից մի նորմալ մարդ դնենք, որ աշխատի: Թող էդ ԺՊ-ն գա կանգնի էստեղ ու ասի՝ մեզնից քանիսի՞ն ա ճանաչում»,- ասաց գյուղացիներից մեկը:
Բյուրականի բնակիչներից մեկ ուրիշն էլ ասաց, որ նախկին համայնքապետից իրենք գոհ են, որովհետև նա լուծել է գյուղի ճանապարհի, լուսավորության և ջրի խնդիրները:
«Էդ մարդը գյուղում ներկայացել է որպես վարչապետի ընկեր: Ասել ա՝ ես Փաշինյանի կուրսեցին եմ, Փաշինյանը երբ փախած էր, Մոսկվա իմ տունն էր ապրում։ Մենք դեմ ենք իրեն, մենք ուզում ենք, որ Բյուրական համայնքի ղեկավարը լինի մեր համայնքի բնակիչ, ծանոթ լինի մեր գյուղի խնդիրներին, թեկուզ ԺՊ լինի»,- վրդովված նշեցին գյուղացիները։
Ակցիայի ընթացքում մի պահ քաշքշուկ սկսվեց ոստիկանների և բողոքող քաղաքացիների միջև, երբ վերջիններս փորձեցին մուտք գործել համայնքապետարանի շենք:
Ռոզա Վարդանյան
