Պայթյուն Հյուսիսային պողոտայում. հայտնի են տուժածների անունները. ԼՈՒՍԱՆԿԱՐՆԵՐ (թարմացվում է)

23:58

«Սուրբ Գրիգոր Լուսավորիչ» ԲԿ-ի վերակենդանացման բաժնի վարիչ Սամվել Կարապետյանն ասաց, որ Ռուբինա Մարկոսյանի՝ մոտ ժամուկես տևող վիահատությունը առաջիկա ժամերին կավարտվի: Բժիշկը նշեց, որ մյուսների վիճակը լավ է ու շատերը ժամեր անց դուրս կգրվեն:

23:12

«Սուրբ Գրիգոր Լուսավորիչ» ԲԿ ժամանած Ազգային ժողովի նախագահ Արա Բաբլոյանը հիվանդասենյակից դուրս գալով տեղեկացրեց, որ վնասվածքները բեկորային են՝ պայթյունից առաջացած, թեթևից մինչև ծանր:  Ամենածանր վիճակում գտնվող երեխայի՝ Ռուբինայի մոտ ազդրի շրջանում մկանները բոլորը վնասվել են ու  մինչև ոսկոր են հասել, բայց բարեբախտաբար ոսկորը չի վնասվել:

 Հարցին՝ այրվածքները ի՞նչ կարգի են, պատասխանեց. «Այրվածքներ չեն բեկորային վնասվածքներ են»:

22:45

Պայթյունի հետևանքով «Սուրբ Գրիգոր Լուսավորիչ» բժշկական կենտրոն է տեղափոխվել 8 տուժած. տեղեկացնում է ՀՀ առողջապահության նախարարության լրատվական վարչության բաժնի պետ Անահիտ Հայթայանը:

Կենտրոնի տնօրեն Արա Մինասյանի գլխավորությամբ հիվանդանոցում բոլոր տուժածներն անցել են անհրաժեշտ հետազոտություն, տրամադրվում է բժշկական օգնություն։ Տուժածներից մեկի վիճակը գնահատվում է ծանր։ Աղջկան, այս պահին վիրահատում են։ Մյուսների վիճակը գնահատվում է կայուն։ Բժշկական օգնությունն արագ և պատշաճ կազմակերպելու նպատակով անմիջապես հիվանդանոց են եկել նաև բուժական գծով փոխտնօրեն Գագիկ Մանուկյանը, ինչպես նաև բոլոր առաջատար մասնագետները։ Տուժածներից 3-ը ՀՀ քաղաքացիներ են, 2-ը՝ Իրանի Իսլամական Հանրապետության, 3-ը Ռուսաստանի Դաշնության։

22:34

 ԱԻՆ փոխանցմամբ՝ նախնական տվյալներով՝  խոհանոցում պայթել է թթվածնի բալոն, կա 8 տուժած՝ Ռուդոլֆ Մարկոսյան (6 տարեկան), Ռուբինա Մարկոսյան (8 տարեկան), Զարուհի Մելիքյան (19 տարեկան), Էրիկ Աշուղյան (24 տարեկան, ԻԻՀ քաղաքացի), Ալյոնա Ագապովա (15 տարեկան, ՌԴ քաղաքացի), Լիզա Աբրահամովա (15 տարեկան, ՌԴ քաղաքացի), Յարոսլավ Լյուբենկո (15 տարեկան, ՌԴ քաղաքացի), Զեյնա Հուսեինի (24 տարեկան, ԻԻՀ քաղաքացի), (այդ թվում օտարերկրյա քաղաքացիներ), ովքեր տեղափոխվել են «Սուրբ Գրիգոր Լուսավորիչ» ԲԿ:

22:12

Հյուսիսային պողոտա ժամանեց ԱԻՆ նախարար Դավիթ Տոնոյանը, որն ասաց, որ Ռուբինայի վիճակը ծանր է, սակայն կյանքին վտանգ չի սպառնում:

22:03

«Տուժել է 8 մարդ: Տուժածներից 8-ամյա Ռուբինա Մարկոսյանի կյանքին վտանգ է սպառնում: Տուժածներից մեկը «Բուրգեր Քինգ» արագ սննդի կետի աշխատակիցն է՝ մենեջերը: Վիրավորում են ստացել Իրանի՝ 2 ու Ռուսաստանի 3 քաղաքացի»,- հավաքված լրագրողներին ասաց  ԱԻՆ աշխատակից, ոստիկանության փոխգնդապետ Տիգրան Ոսկանյանը:

Փոխգնդապետն ասաց, որ տուժած մյուս երեխան 6-ամյա Ռուդոլֆ Մարկոսյանն է, որը, հավանաբար, Ռուբինայի կրտսեր եղբայրն է:

21:58

«Սուրբ Գրգոր Լուսավորիչ» ԲԿ-ի տնօրեն Արամ Մինասյանի տեղեկացմամբ՝ տուժածներից մեկն այժմ վիրահատվում է, վնասվել է ազդրը: Մյուս 8 տուժածների վիճակը գնահատվում է բավարար:

21:52

Նշվեց, որ ըստ ոստիկանների նախնական եզրակացության, պայթյունը միտումնավոր չի եղել: Իսկ ոստիկանության լրատվական վարչության պետ Աշոտ Ահարոնյանն ասաց, որ պայթյունի պատճառը հավանաբար գարեջրի լցնովի բալոնի ճնշումն ապահովող սարքն է եղել:

Ապրիլի 2-ին՝ ժամը 20:44-ին, ահազանգ է ստացվել, որ Երևան քաղաքի Հյուսիսային պողոտայի թիվ 5 հասցեում գտնվող «Բուրգեր Քինգ» արագ սննդի կետում տեղի է ունեցել պայթյուն, կան տուժածներ. անհրաժեշտ է փրկարարների օգնությունը: