19.11.2024 | 18:41
ԵԽ մարդու իրավունքների հանձնակատարն Ալիևին կոչ է արել ազատ արձակել իրավապաշտպաններին, լրագրողներին և քաղակտիվիստներին
Ադրբեջանն ու Բելառուսը քննարկել են երկկողմ ռազմական համագործակցության զարգացման հեռանկարները
Քաղաքականություն
02.11.2021 | 17:53
Բելառուսի պաշտպանության նախարար, գեներալ-լեյտենանտ Վիկտոր Խրենինը հանդիպել է Մինսկում Ադրբեջանի արտակարգ ու լիազոր դեսպան Ուլվի Բախշիալիևի հետ։ Այս մասին հայտնում են ադրբեջանական լրավամիջոցները՝ վկայակոչելով Բելառուսի ՊՆ-ին։
«Հանդիպման ընթացքում քննարկվել են երկկողմ ռազմական համագործակցության ուղղությունները, ընդգծվել է Բելառուսի և Ադրբեջանի միջև ռազմական ու ռազմատեխնիկական ոլորտում նշանակալի ներուժի առկայությունը»,- ասվում է հաղորդագրության մեջ։
Նշվում է նաև, որ հանդիպման արդյունքներով կողմերը համոզմունք են հայտնել տարբեր ոլորտներում երկու երկրների միջև համագործակցության հաջող զարգացման ուղղությամբ, այդ թվում՝ ռազմական ոլորտում։
Չնայած Բելառուսը Հայաստանի հետ միասին ՀԱՊԿ անդամ է, այնուամենայնիվ, ռազմական ոլորտում ակտիվորեն համագործակցում է Ադրբեջանի հետ։ Ըստ հրապարակային աղբյուրների տվյալների՝ Ադրբեջանը Բելառուսից գնել է T-72 տանկեր, Д-30 հաուբիցներ, 2С7 Պիոն հրետանային հենարաններ, БТР-70 զրահամեքենաներ, Սու-25 գրոհայիններ, Պոլոնեզ հրթիռային համակարգեր և այլ զինատեսակներ։
Էմմա Չոբանյան
