11.10.2026 | 15:59
Վթարային ջրանջատում Մալաթիա-Սեբաստիա և Էրեբունի վարչական շրջաններում
Թուրքիան և ՌԴ-ն բանակցում են Սիրիայի Քոբանի քաղաքը քրդական ուժերից ազատելու շուրջ․ Middle East Aye
Քաղաքականություն
02.11.2021 | 17:18
Թուրքիան և Ռուսաստանը բանակցում են Սիրիայի սահմանամերձ Քոբանի քաղաքում թուրքական ռազմական գործողության շուրջ՝ այն քրդական YPG-ի միավորումներից ազատելու համար։ Այս մասին Middle East Eye-ին հայտնել են իրավիճակին ծանոթ աղբյուրները։
Նշենք, որ դեռ նախորդ ամիս Թուրքիայի նախագահ Ռեջեփ Թայիփ Էրդողանն ասել էր, որ իրենց համբերությունը սպառվել է, և ազդարարել էր Սիրիայում գործողություններ իրականացնելու մասին։
Լրատվամիջոցը գրում է, որ վերցնելով Քոբանին՝ Թուրքիան նպատակ ունի փակել սահմանի արևմտյան հատվածը և այն միավորել թուրքական վերահսկողության տակ գտնվող Ջարաբլուզի և Թալ Այբադի հետ։ Քոբանին լայնածավալ ռազմական գործողությունների վայր է եղել YPG-ի և ԻԼԻՊ-ի միջև, որտեղ քրդական խմբերը ԱՄՆ-ի ավիահարվածների աջակցությամբ հետ էին մղում ԻԼԻՊ-ի գրոհայինների հարձակումները 2014-2015 թվականներին։
Քոբանին 2012 թվականից պահվում էր YPG-ի կողմից, մինչև սիրիական և ռուսական զորքերը մտան քաղաք 2019 թվականին՝ թուրքական ներխուժման ժամանակ։
Աղբյուրները լրատվամիջոցին հայտնել են, որ գործարքի նախագծի համաձայն՝ Ռուսաստանը պահպանում է իր ներկայությունը Քոբանիում, որը հայտնի է նաև որպես Այն ալ-Արաբ, մինչդեռ Անկարան գրավելու է շրջապատող տարածքները դեպի ռազմավարական M4 մայրուղի։ Թուրքիան չի տեղակայի իր դաշնակից Սիրիական ազգային բանակի ուժերը քաղաքում, իսկ M4 մայրուղում լինելու է միացյալ ռուս-թուրքական վերահսկողություն։ Թուրքիան նաև կպահպանի Սարրինի ռուսական բազայի անվտանգությունը։ Դրա դիմաց Ռուսաստանը կհամոզվի, որ YPG-ի մարտիկները հետ են քաշվում դեպի հարավ։
Նույն աղբյուրների համաձայն՝ Ռուսաստանը Քոբանիի գործողությունը կապում է Իդլիբի հետ, սակայն դեռևս պարզ չէ՝ Անկարան պատրա՞ստ է տարածքներ զիջել Իդլիբում, որտեղ միլիոնավոր սիրիացիներ փոքր տարածքում են՝ խիտ տեղակայված ռազմական օբյեկտներով ու զինված խմբերով։
MEE-ին աղբյուրները հայտնել են, որ Ռուսաստանի հետ բանակցությունները շարունակվում են և Էրդողանին անհրաժեշտ է որևէ գործարք՝ նախքան ռազմական գործողությունը սկսելը։
«Ի վերջո՝ դա քաղաքական որոշում է»,- ասել է աղբյուրներից մեկը։
Մյուս կողմից էլ MEE-ին թուրքական անվտանգության ուժերի առանձին աղբյուրներ ասել են, որ զինվորականները գրեթե ավարտել են Հյուսիսային Սիրիայում նախնական ներխուժման նախապատրաստական աշխատանքները:
«Մենք նաև գրեթե ավարտել ենք մեր տեղակայումները Իդլիբում, որպեսզի պաշտպանենք տարածքը սիրիական ռեժիմից և ռուսական հարձակումներից։ Անցյալի փորձը հուշում է, որ մենք պետք է ռազմական առումով պատրաստ լինենք Իդլիբում, նույնիսկ եթե Մոսկվայի հետ գործարք ունենանք՝ Ռուսաստանի հետ մեր անցյալ փորձի պատճառով»,- ասել է աղբյուրներից մեկը:
Էմմա Չոբանյան
