09.06.2026 | 00:17
Մարկո Ռուբիոն շնորհավորել է Փաշինյանին
«Բավական է բնությանը զուգարանի պես վերաբերվել․ մենք մեր սեփական գերեզմաններն ենք փորում»․ Անտոնիո Գուտերեշ
Քաղաքականություն
01.11.2021 | 19:22
Միավորված ազգերի կազմակերպության (ՄԱԿ) գլխավոր քարտուղար Անտոնիո Գուտերեշն ամրապնդում է իր համբավը՝ որպես ջերմոցային գազերի արտանետումների կրճատման հրատապ գործողությունների ամենաաղմկահարույց ջատագովներից մեկը, գրում է BBC News-ը։
ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովի (COP26) ժամանակ նա հայտարարել է, որ «կախվածությունը հանածո վառելիքից մարդկությանը մղում է դեպի անդունդի եզրը»:
«Կա՛մ մենք սա կկանգնեցնենք, կա՛մ այն մեզ կկանգնեցնի։ Ժամանակն է ասել՝ բավակա՛ն է։ Բավական է ինքներս մեզ սպանենք ածխածնով։ Բավական է բնությանը զուգարանի պես վերաբերվել։ Բավական է է՛լ ավելի խորը այրենք, հորատենք և արդյունահանենք մեր ճանապարհը։ Մենք մեր սեփական գերեզմաններն ենք փորում»,- հայտարարել է ՄԱԿ-ի գլխավոր քարտուղար Անտոնիո Գուտերեշը։
Հավելենք, որ ՀՀ նախագահ Արմեն Սարգսյանը ևս մեկնել է Միացյալ Թագավորություն՝ մասնակցելու Գլազգոյում կայանալիք ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26): Գլազգոյի համաժողովը համանախագահելու են Միացյալ Թագավորությունն ու Իտալիան: Քննարկումներին մասնակցելու են պետությունների ղեկավարներ, կլիմայի փոփոխության փորձագետներ, գործարար ու քաղաքացիական հանրության առաջնորդներ: Համաժողովը նպատակ ունի մշակել կլիմայի փոփոխության դեմ պայքարի համաձայնեցված գործողությունների ծրագիր։
Տաթև Ֆռանգյան
