Քաղաքականություն
29.10.2021 | 20:40Խորհրդարանում Ռոբերտ Քոչարյանի և Սերժ Սարգսյանի քաղաքական թիմերը ներկայացնող խմբակցությունները հրաժարվում են հանդիպել վարչապետ Նիկոլ Փաշինյանի հետ ու քննարկել Հայաստանի անվտանգությանն առնչվող հարցերը:
Փաշինյանն ԱԺ-ում պատգամավորների հարցերին պատասխանելիս էր համաձայնություն տվել փակ ռեժիմով հանդիպել ընդդիմադիր խմբակցություններին և պատասխանել նրանց հարցերին:
«Հայաստան» և «Պատիվ ունեմ» խմբակցությունները, որոնք շուրջ երկու ամիս է՝ գործադիր մարմնի առաջին դեմքերին պահանջում են ներկայանալ խորհրդարան ու պատասխանել սահմանային խնդիրների վերաբերվող հարցերին, Փաշինյանի համաձայնությունից հետո դեմ արտահայտվեցին վարչապետի հետ հանդիպել: «Պատիվ ունեմ» խմբակցության քարտուղար, ՀՀԿ-ական Հայկ Մամիջանյանը նույն պահին հայտարարեց, որ Փաշինյանի հետ կհանդիպեն միայն վերջինիս հրաժարականի հարցը քննարկելու օրակարգով: Խմբակցության դիրքորոշումը վերահաստատեց նաև Տիգրան Աբրահամյանը։
«Հայաստան» խմբակցության դեպքում Փաշինյանի հետ փակ դռների հետևում ազգային անվտանգությանն առնչվող հարցերի քննարկման մերժումը մի փոքր ուշ եղավ:
ԱԺ դահլիճում այսպիսի դիրքորոշումներ հայտնելուց շատ ժամանակ չանցած՝ «Հայաստան» խմբակցությունը հայտարարություն տարածեց, թե Փաշինյանն իր պատասխաններով մոլորեցնելով հասարակությանը՝ փորձ արեց տպավորություն ձևավորել, թե «Հայաստան» դաշինքը պատրաստ է իր հետ փակ քննարկումների ու զրույցների:
ԱԺ «Քաղաքացիական պայմանագիր» խմբակցության պատգամավոր, վարչապետի հետ ազգակցական կապեր ունեցող Հրաչյա Հակոբյանը «Հայաստան» խմբակցության՝ Փաշինյանի հետ հանդիպելու մտքից հրաժարվելը կապում է Ռոբերտ Քոչարյանի գործոնով:
Քոչարյանի թիմակից, նրա շահերը դատարաններում պաշտպանող Արամ Վարդևանյանը բացառում է, որ խմբակցությունը Փաշինյանի հետ հանդիպելու ցանկություն է ունեցել և այդ մտքից հետ են կանգնել Ռոբերտ Քոչարյանի ցուցումով:
Հրաչյա Հակոբյանը, սակայն, հակառակն է պնդում: Նա վստահեցնում է՝ լսել է, թե ընդդիմադիրներն ինչպես են վարչապետին առաջարկում հանդիպել: Արամ Վարդևանյանի խոսքով՝ իրենց պահանջը սխալ է ընկալվել:
Ուշագրավ է, սակայն, որ «Հայաստան» խմբակցությունը Փաշինյանի հետ հանդիպման տարբերակը կտրուկ մերժում է խմբակցության ղեկավար Սեյրան Օհանյանի մեկ այլ հայտարարության ֆոնին: Օրերս, երբ ընդդիմադիրների հրավերով խորհրդարան էին ժամանել ԳՇ պետի տեղակալ Կարեն Քոչունցն ու ԱԱԾ սահմանապահ զորքերի հրամանատար Արման Մարալչյանը, փակ հանդիպումից հետո Սեյրան Օհանյանը հայտարարեց, որ նրանց պատասխաններն իրենց չի բավարարել, և որ անհրաժեշտություն կա ԱԺ հրավիրել առաջին դեմքերին, այդ թվում՝ նաև Փաշինյանին:
Քոչարյանի թիմից, սակայն, առայժմ շեշտում են՝ Փաշինյանի հետ կհանդիպեն միայն իշխանության փոխանցման օրակարգով:
ՔՊ խմբակցությունից հիշեցնում են հուլիսին տեղի ունեցած ընտրությունների, Փաշինյանի ստացած 54 տոկոս քվեի մասին և հույս հայտնում, որ նոր ընտրությունների դեպքում էլ նորից իշխանություն կձևավորեն:
Քոչարյանի գլխավորած «Հայաստան» դաշինքը, այնուհանդերձ, իշխանափոխության օրակարգով փողոցային պայքար է սկսելու: Նրանց միանալու է նաև Սերժ Սարգսյանի «Պատիվ ունեմ» խմբակցությունը: Նոյեմբերի 9-ին և 10-ին խորհրդարանական ընդդիմությունը Փաշինյանի հրաժարականի պահանջով դուրս է գալու փողոց: Հանրահավաքներ տեղի կունենան Ազատության հրապարակում։
Մանրամասները՝ տեսանյութում։
Նարեկ Կիրակոսյան
