19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Թուրքիան պատրաստվում է 4 ուղղությամբ հարձակվել Սիրիայում քրդական ուժերի դիրքերի վրա
Քաղաքականություն
29.10.2021 | 18:54
Թուրքական բանակը, սիրիական զինված ընդդիմության աջակցությամբ, պատրաստվում է հարձակում սկսել Սիրիայի հյուսիսային չորս շրջաններում քրդական ստորաբաժանումների դիրքերի վրա։ Այս մասին գրում է ՏԱՍՍ-ը՝ վկայակոչելով սաուդյան Asharq Al-Awsat պարբերականը։
Աղբյուրի փոխանցմամբ՝ եթե նոր ռազմական գործողություն սկսվի, թուրքական զորքերը և ընդդիմադիր զինյալները կհարձակվեն քրդական Ժողովրդական ինքնապաշտպանության ջոկատների մարտիկների վրա՝ Հասաքե նահանգի կենտրոնից 40 կմ հեռավորության վրա գտնվող Թել Թամերայի ճակատային հատվածում։
Ըստ պարբերականի՝ վերջին օրերին թուրքական անօդաչու թռչող սարքերը մշտապես պարեկություն են անում այս տարածքի երկնքում և ժամանակ առ ժամանակ հարվածներ են հասցնում քրդերի ռազմական մեքենաների և նրանց կրակակետերի ուղղությամբ։ Ավելի վաղ Թել Թամերայում, որը բնակեցված է հիմնականում քրիստոնյա ասորիներով, պարբերաբար բախումներ էին տեղի ունենում քրդական ստորաբաժանումների և ընդդիմադիրների միջև։
Քրդերի և թուրքամետ կազմավորումների շփման մեկ այլ կետ է Այն Իսա քաղաքը և նրա շրջակայքը Ռաքքա նահանգի հյուսիսում։ Տարածքը կարևոր է քրդական ուժերի համար, քանի որ այդտեղով են անցնում Դեր Զոր նահանգում գտնվող քուրդ զինյալների մատակարարման գծերը: Եթե այն թուրքական զորքերի և նրանց դաշնակիցների վերահսկողության տակ անցնի, քրդերի ձեռքում գտնվող Սիրիայի արևմտյան և արևելյան շրջանների միջև տնտեսական և սոցիալական կապը կխաթարվի։
Երրորդ շրջանը, որտեղ կարող են սկսվել կողմերի միջև մարտերը, Եփրատի արևելյան ափին գտնվող Քոբանի քաղաքն է (Այն ալ-Արաբ): Այս քաղաքում քուրդ մարտիկներն առաջին հաղթանակն են տարել «Իսլամական պետություն» ահաբեկչական խմբավորման դեմ 2015 թվականին։ 2016-ին նրանք ահաբեկիչներից ազատագրել են հարևան Մանբիջը, որը Սիրիայի հյուսիսային մայրաքաղաք Հալեպից 40 կմ հեռավորության վրա է։
Ակնկալվում է, որ չորրորդ թեժ կետը կլինի Թել Ռիֆաաթ քաղաքը և դրա շրջակա գյուղերը, որտեղ քրդական ուժերը տեղաշարժվել են Աֆրինում իրենց հենակետը կորցնելուց հետո:
Հիշեցնենք, որ հոկտեմբերի 26-ին Թուրքիայի խորհրդարանը հավանություն է տվել Սիրիայում և Իրաքում գործողություններ իրականացնելու համար զինված ուժերի լիազորությունները երկու տարով երկարաձգելու՝ կառավարության խնդրանքին։ Տրված մանդատի համաձայն՝ թուրքական բանակը կարող է ռազմական գործողություններ իրականացնել երկրի սահմաններից դուրս։
Տաթև Ֆռանգյան
