09.06.2026 | 00:17
Մարկո Ռուբիոն շնորհավորել է Փաշինյանին
Եթե ԱՄՆ-ն հրաժարվի F-35 և F-16 ինքնաթիռների վաճառքից, Թուրքիան կարող է դիտարկել ռուսական Սու-35-ի և Սու-57-ի տարբերակը․ Չավուշօղլու
Քաղաքականություն
28.10.2021 | 20:22
Թուրքիան կարող է դիտարկել ռուսական Սու-35 և Սու-57 ինքնաթիռների գնման տարբերակը, եթե ԱՄՆ-ն հրաժարվի արդիականացված F-16-ի մատակարարումից։ CNNTurk հեռուստաընկերության հետ զրույցում այս մասին հայտարարել է Թուրքիայի ԱԳ նախարար Մևլութ Չավուշօղլուն, գրում է «Անադոլուն»։
Մեկնաբանելով ամերիկացի կոնգրեսակաների խմբի դիմումը՝ Թուրքիային F-16 չվաճառելու պահանջով, թուրք նախարարը նշել է, որ ԱՄՆ-ում Անկարայի դեմ գործում են տարբեր լոբբիներ։
«Այդ հարցում կարևորը Սպիտակ տան դիրքորոշումն է։ Նախագահ Ջո Բայդենի վարչակազմը կարող է Կոնգրեսին համոզել՝ աջակցել Թուրքիային զենքի վաճառքի հարցում։ Եթե ԱՄՆ իշխանությունները լինեն վճռական, ապա օրենսդիրները կաջակցեն որոշմանը»,- ասել է Չավուշօղլուն։
Նա նաև ընդգծել է, որ Անկարան այլընտրանքային տարբերակներ ունի։
«Ռազմական ապրանքների մի մասն այսօր արտադրվում է հենց Թուրքիայում, մի մասը ներկրում ենք։ Դա վերաբերում է նաև F-35 և F-16 ինքնաթիռների գնմանը։ Եթե ԱՄՆ-ն չցանկանա Թուրքիային ինքնաթիռները վաճառել, ապա մենք կդիտարկենք այլ տարբերակներ, այդ թվում՝ Սու-35-ի և Սու-57-ի։ Այդպես կշարունակվի՝ մինչև մենք չսկսենք սեփական ինքնաթիռներն արտադրել»,- ասել է Թուրքիայի ԱԳ նախարարը։
Էմմա Չոբանյան
