Քաղաքականություն
28.10.2021 | 18:17Factor TV-ի տաղավարում զրուցել ենք ադրբեջանագետ Տարոն Հովհաննիսյանի հետ
– Պարո՛ն Հովհաննիսյան, նոյեմբերի 9-ի մոտենալու հետ ակտիվանում են խոսակցությունները եռակողմ հնարավոր նոր հանդիպման և հնարավոր նոր փաստաթղթի մասին։ Ադրբեջանում ի՞նչ քննարկումներ կան այս թեմայով։
– Կան, իհարկե, նման քննարկումներ, բայց հղումն արվում է այն աղբյուրներին, որոնցից տարածվել է տեղեկությունը։ Այսինքն՝ Ադրբեջանում էլ «Ալիք Մեդիա»-ին հղումով ներկայացնում են, որ այսպիսի բան է գրում հայկական մեդիան, և դրա շուրջ են շարունակում ծավալվել։ Իրենց սեփական աղբյուրները, ադրբեջանական աղբյուրները ինֆորմացիա չեն հաղորդել։
– Ադրբեջանական իշխանությունները, փորձագետները հավելյալ տեղեկություններ ներկայացնո՞ւմ են։
– Ո՛չ, հավելյալ տեղեկություններ չունեն։ Փորձում են այս ամեն ինչը ներկայացնել իրենց ձեռնտու տեսանկյունից, թե՝ տեսեք՝ հայերն են ասում, որ լինելու է ինչ-որ հայտարարություն կամ համաձայնագիր, որով մեր տարածքային ամբողջականությունն է ճանաչվելու և այլն։
– Տարբեր քաղաքական ուժերի ներկայացուցիչներ պարբերաբար ասում են, որ պետք է բանակցություններով ադրբեջանցիներին դրդել, որ դուրս գան հայկական տարածքներից։ Ադրբեջանցիներն առհասարակ գրավածը բանակցություններով վերադարձնելու հակվա՞ծ են։
-Իհարկե՝ ոչ։ Պատերազմից հետո խոսել ինչ-որ բան բանակցությունների միջոցով ստանալու մասին, աբսուրդի ժանրից է։ Ինչո՞ւ իրենք պետք է իրենց պարտավորված համարեն ինչ-որ տեղից դուրս գալու, եթե դիմացը համարժեք կամ ավելի բան չեն ստանում։ Ի՞նչը պետք է ստիպի։ Ի՞նչ ունենք մենք դիմացը տալու՝ համարժեք ու ավելի։
Հարցազրույցն ամբողջությամբ` տեսանյութում։
Գարիկ Հարությունյան
