18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Սպիտակ տունը չի հաստատում Բայդենի և Էրդողանի հանդիպման մասին Թուրքիայի նախագահի հայտարարությունը
Քաղաքականություն
28.10.2021 | 13:09
ԱՄՆ կառավարությունը դեռ աշխատում է այս շաբաթ Հռոմում կայանալիք G20-ի գագաթնաժողովի ընթացքում նախագահ Ջո Բայդենի և Թուրքիայի նախագահ Ռեջեփ Թայիփ Էրդողանի հնարավոր հանդիպման ուղղությամբ։ Այս մասին հայտարարել է Սպիտակ տան մամուլի խոսնակ Ջեն Փսակին, գրում է «Ահվալ» գործակալությունը։
Հիշեցնենք, որ նախօրեին Թուրքիայի նախագահ Ռեջեփ Թայիփ Էրդողանը հայտարարել էր, թե ԱՄՆ նախագահի հետ հանդիպելու է Գլազգոյում կլիմայական գագաթնաժողովի ընթացքում և քննարկելու է F-35 կործանիչների հարցը։
«Մենք օրացույցում տեղ ունենք, աշխատում ենք վերջնական տեսքի բերել լրացուցիչ երկկողմ հանդիպումները։ Ես դեռևս ոչինչ չեմ կարող կանխատեսել»,- ասել է Փսակին։
Նա նաև անդրադարձել է Թուրքիայի հետ անցյալ շաբաթ ծագած դիվանագիտական ճգնաժամին, երբ Էրդողանը սպառնում էր վտարել երկում ԱՄՆ-ի ու ևս 9 երկրի դեսպաններին՝ բանտարկված բարերար ու իրավապաշտպան Օսման Քավալային ազատ արձակելու կոչի պատճառով։
Փսակին ասել է, որ ԱՄՆ-ը հետ չի կանգնում հայտարարության բովանդակությունից։
«Մենք շարունակում ենք խոսել բանտարկված ակտիվիստների, լրագրողների ու անհատների մասին ամբողջ աշխարհում, այդ թվում՝ Թուրքիայում։ Մենք նաև մասնավոր ու հրապարակային ենք հարցերը բարձրացնում, որտեղ տեսնում ենք մտահոգություններ, ինչպես այս դեպքում»,- ասել է Փսակին՝ հավելելով․ «Թուրքիան մնում է ՆԱՏՕ-ի դաշնակից, երկիր, որի հետ մենք կշարունակենք աշխատել ընդհանուր շահերի ուղղությամբ՝ շարժվելով առաջ»։
Էմմա Չոբանյան
