22.04.2026 | 23:30
ՀՀ տարածքում ավտոճանապարհները հիմնականում անցանելի են
Նոյեմբերի 9-ին Փաշինյանի և Ալիևի միջև հանդիպում նախատեսված չէ. Արմեն Գրիգորյան․ ՏԵՍԱՆՅՈՒԹ
Քաղաքականություն
28.10.2021 | 12:28
Նոյեմբերի 9-ին Փաշինյանի և Ալիևի միջև հանդիպում նախատեսված չէ: Լրագրողների հետ ճեպազրույցում այս մասին հայտարարեց Անվտանգության խորհրդի քարտուղար Արմեն Գրիգորյանը՝ անդրադառնալով մամուլում շրջանառվող տեղեկությանն այն մասին, որ Մոսկվայում նախատեսվում է հանդիպում, որտեղ Հայաստանի և Ադրբեջանի ղեկավարները ստորագրելու են 2 փաստաթուղթ, որոնցից մեկը վերաբերելու է երկու երկրների տարածքային ճանաչմանը, մյուսը՝ կոմունիկացիաների հետ կապված:
«Բազմիցս նշել ենք, որ եթե ընթանում է որևէ գործընթաց, մենք տեղյակ ենք պահում»,- նշեց Գրիգորյանը:
Անվտանգության խորհրդի քարտուղարն ընդծեց, որ Հայաստանը պատրաստ է Ադրբեջանի հետ սահմանագծման ու սահմանազատման գործընթացին:
«Դրա կարևոր մոտեցումներից է Հայաստանի և Ադրբեջանի զորքերի հայելային հետքաշումը, համապատասխան տարածքներում երկու երկրների սահմանապահ զորքերի տեղակայումն ու դելիմիտացիայի և դեմարկացիայի մեկնարկը», – նշեց Գրիգորյանը:
Նա հավելեց, որ Հայաստանի համար որևէ խանգարող հանգամանք չկա այս պահին: «Մենք հայտարարել ենք, որ պատրաստ ենք դեմարկացիայի և դելիմիտացիայի գործընթաց սկսել, այդ մասով սպասում ենք դրական ազդակի Ադրբեջանից», – ասաց Գրիգորյանը։
Նրա խոսքով՝ Ադրբեջանն այդ մասին ՄԱԿ-ում հայտարարել է, սակայն գործընթացն առաջ չի շարժվում։
«Կարծես թե, սեպտեմբերին ՄԱԿ-ում նրանք այդպիսի հայտարարություն արել են, բայց մենք չենք կարողանում այս մասով առաջ գնալ։ Ինչ վերաբերվում է նախապայմանին կամ ինչ-որ բանին, ես կդժվարանամ ասել, թե Ադրբեջանն ինչու չի սկսում դեմարկացիայի և դելիմիտացիայի գործընթացը»,- նշեց Գրիգորյանը։
Մանրամասները՝ տեսանյութում:
